FinHakaton-1-1

Прв ФинХакатон на Министерство за финансии и ФИТР

Министерството за финансии на Република Македонија во соработка со Фондот за иновации за првпат организира ФинХакатон. Oвој 48-часовен предизвик има за цел да собере и поттикне млади, креативни и иновативни луѓе да изработат демо иновативни софтверски и мултимедијални решенија. Креираните алатки ќе треба да ги доближуваат јавните финансии до граѓаните.

Крајниот производ се алатки креирани од граѓаните за граѓаните.

Настанот ќе опфати креација на три софтверски и мултимедијални решенија – веб-апликација, видео и видеоигра. Овој процес покрај креативноста ќе поттикне и претприемничко размислување кај младите.

Министерството за финансии во соработка со Фондот за иновации и технолошки развој ќе овозможи искористување на наградниот фонд од 1,5 милиони денари за реализација и финализација на победничките решенија по завршувањето на ФинХакатон. Победниците ќе имаат можност да основаат сопствена стартап компанија. Менторите ќе им помогнат на учесниците во реализацијата на нивните идеи.

На настанот може да се пријави секој што има пасија да работи на овие проекти користејќи отворени податоци. Во секој тим потребни се членови со предзнаења во делот на развој на веб-апликации, дизајн, хардвер, софтвер, економија, бизнис и маркетинг, мултимедија. Може да се пријави секое лице државјанин на Република Македонија со наполнети 18 години, поединци или тимови.

Натпреварот ќе се одржи од 6 до 8 јули 2018 година во просториите на Министерството за финансии. За таа цел натпреварувачите ќе треба да бидат присутни 48 часа во Министерството. Пријавувањето на поединците или тимовите ќе трае до 30 јуни 2018 год., регистрацијата ќе се одвива на следниот линк: hackaton.finance.gov.mk.