predizvik_za_mladi_9-6-2018_1

4,2 милиони денари доделени на најуспешните 20 училишта кои учествуваа на „Предизвикот за млади истражувачи“

Во Владата на Република Македонија се одржа настан во организација на Фондот за технолошки развој и иновации посветен на прогласување на најуспешните 20 училишта од Предизвикот за млади истражувачи. Претседателот на Владата на Република Македонија, Зоран Заев им посака топло добредојде на присутните ученици, ментори, наставници и присутни гости и заедно со министрите за образование и здравство, Арбер Адеми и Венко Филипче и директорот на Фондот за иновации и технолошки развој, Јован Деспотовски, им доделија вредносни ваучери на најуспешните истражувачки проекти на 20 основни и средни училишта од цела Македонија.

Премиерот Заев во своето поздравно обраќање рече дека креативното размислување и истражувачкиот дух кај децата и учениците треба да бидат поттикнувани во рамки на образовниот процес, од општеството, во семејствата.

„Мотивирани млади луѓе се градителите на стабилна и економски перспективна иднина. Такви млади луѓе и се потребни и на нашата Македонија. Во вас драги ученици, млади истражувачи го препознавам тој креативен потенцијал што и е потребен на Македонија! И со вашиот вложен труд и резултатите што ги постигнавте денеска го потврдувате тој факт“, порача премиерот Заев.

Министерот за образование и наука, Арбер Адеми рече дека знаењето, иновациите ги движат земјите и светот напред и во тој правец подвлече дека Владата на Република Македонија има јасна стратегија преку конкретни мерки и активности за поттикнување на иновативноста и креативноста.

„Денешниот настан е потврда за јасната заложба за поттикнување на иновативноста. За младите да создаваат нови идеи а ние да ги поддржуваме во нивната реализација. Ви посакувам многу нови успеси во иднина“, порача министерот Адеми.

Директорот на Фондот за иновации и технолошки развој, Јован Деспотовски во детали зборуваше за истражувачките проекти кој беа наградени и рече дека околу 100-тина училишта се пријавиле на предизвикот и изрази уверување дека на вториот предзивик ќе земат учество уште поголем број на училишта.

„Иновацијата ве предизвика, и на неа одговоривте со: Изработка на дрон, на хидрапонична градина, Систем за детекција на гасови во воздух во работни простории, Фотоволтаична централа, Стаклена градина Индиго Росе, Отпорност на градинарските култури на кисели дождови и десетици други успешни истражувачки проекти. Со нив само се уверивме дека во вас има креативен, критичен и иновативен потенцијал независно во кое училиште учите, и од кој дел на Македонија ни доаѓате. И затоа првичниот буџет за награден фонд на Предизвикот од 1, 5 милион денари, го зголемивме за скоро трипати и денес тој изнесува 4,2 милиони денари бидејќи наш приоритет е да вложуваме во вашиот развој и идеи. Вложувањето во развојот на вашите потенцијали, е предизвик на кој ние треба да одговориме. Знаеме дека не е едноставно, но е неизмерно значајно за нашата заедничка иднина. Верувам дека меѓувас денес е идниот Закерберг, Илон Маск, Џек Ма“, порача директорот Деспотовски.

Настанот заврши со заедничко селфи на учениците и менторите од наградените училишта, премиерот, министрите и директорот што го направи младиот и популарен јутјубер Стефан, препознатлив кај децата и учениците како Стефонатор, кој инаку беше и модератор на настанот.