Македонски средношколци поддржани од ФИТР се вратија од Светска олимпијада со златен и три бронзени медали

Македонско географско друштво учествуваше на XIII Светска олимпијада по геонауки која се одржа од 26 Август до 3 Септември 2019 година во Даегу, Јужна Кореја.

На олимпијадата, на која учествуваа претставници од 40 земји, нашиот тим освои бронзен медал од севкупната категорија, едно злато во категоријата теренски анализи и две бронзи од практичните истражувања и презентации.

Македонско географски друштво_Меѓународна олимпијада по геонауки 2

Тимот се состоеше од следните ученици:

Сара Стојчевска, СОУ Гимназијата „Гоце Делчев“ во Куманово

Кристина Спасовска, СОУ Гимназијата „Гоце Делчев“ во Куманово

Јована Маниќ, СОУ Гимназијата „Гоце Делчев“ во Куманово

Оливер Куновски, СУГС „Орце Николов“ во Скопје

Учениците се организираа и подготвуваа за настанот од страна на д-р Ивица Милевски, д-р Свемир Горин и д-р Билјана Апостоловска Тошевска, професори на Институтот за географија при Природно-математички Факултет во Скопје.

Лого Фонд за талентирани деца со лого на ФИТР

Поддршката на ФИТР е дел од Програмата за поддршка и развој на таленти која Фондот ја развива во соработка со УНИЦЕФ. Тим од професори, претставници на академската фела и ФИТР веќе неколку месеци работат на изготвување концепт кој треба да биде претставен наскоро, со кој ќе се предложи системско решение кое ќе вклучува инструменти за поддршка на талентираните деца и координирани активности како и иницијативи на сите релевантни институции.

Оваа иницијатива е произлезена од бројните барања за поддршка на ученици од страна на ФИТР, како и од програмата за поддршка на млади истражувачи која прв пат беше објавена во ноември 2017 година.

Инаку ФИТР само во изминатата година има инвестирано близу 10 милиони денари во реализација на програми наменети за млади и деца од различни возрасти, со цел поттикнување на нивната критичка мисла и иновативност.

Се отвори првиот центар на стартап заедницата во Скопје – MKstartups Space

Македонската стартап заедница доби свој центар MKstartups Space наменет за настани, вмрежување и едукација на иновативните претприемачи. Центарот се наоѓа во Скопје на локација кај автобуската станица Рекорд, и е под водство на Асоцијацијата Стартап Македонија во соработка со Фондот за иновации и технолошки развој.

„Сега е вистински подвиг да споиме уште еден важен дел во сложувалката, со цел градење и управување со “дом“ на стартап заедницата, физички простор и претприемачки центар, со што ќе ги споиме сите актери во македонскиот екосистем под еден покрив. Во MKstartups центарот ќе ја продлабочуваме соработката со компаниите која треба во иднина да придонесе до иновативни идеи, размена на знаење, вмрежување, како и аплицирање на активни програми за финансиска поддршка” изјави Дејан Алексов, претседател на Стартап Македонија.

Отворање на MKstartups Space 2

Потпишувањето на договорот за соработка помеѓу Стартап Македонија и Фондот за иновации и технолошки развој е прв чекор за поддршка од државата за стартап заедницата со отстапување на простор за основање на центарот.

„Верувам дека поддршката на креативните млади луѓе и нивните идеи преку најразлични мерки е поттик да ја градат нивната иднина во нашата држава, а своите успешни бизнис приказни да ги извезуваат надвор од нашите граници. Со нашата помош на Стартап Македонија  целиме сите засегнати страни во стартап екосистемот кохерентно да работат на подобрување на деловните услови во земјава и создавање повеќе можности за одржливи бизниси.  Република Северна Македонија годинава бележи скок од 25 места на ранг листата на Глобалниот иновациски индекс што е уште еден показател дека сме на добар пат и дека треба да продолжиме заедно со Владата да им бидеме партнери на оние кои имаат желба да направат позитивни промени и да ја зајакнат економијата во државава“ потенцираше Јован Деспотовски, директор на Фондот за иновации и технолошки развој.

Отворање на MKstartups Space 4

Стартап Македонија активно го развива македонскиот стартап и иновативен екосистем веќе 5 години. Како лидери работат на зајакнување на капацитетите, овозможување соработка, развој на претприемачкиот начин на размислување, споделување на можности и надминување на предизвиците.

„Заедно во #MКstartups Space, можеме да изградиме уште посилна заедница, да го зајакнеме претприемачкиот дух, да се натпреваруваме со меѓународната конкуренција, да поддржиме и градиме глобално успешни стартапи, да создаваме компетитивни работни места и економска стабилност за македонското општество. Со локалните партнери работиме на создавање услови за соработка наместо конкуренција, додека пак SwissEP екперти од светски рамки споделуваат знаење и вештини со нив  и баш тој микс ни овозможува овој еко систем да биде не само дел од  туку и атрактивен  во глобалната стартап заедница“ додаде Нина Николиќ, Координатор на Швајцарската програма за претприемништво, (SwissEP).

На отворањето на центарот од Амбасадата на Швајцарија го потенцираа развојот на стартап сцената во државата и посакаа успех во неговото натамошно развивање.

„Кога Швајцарија ја започна својата поддршка кон македонскиот претприемачки екосистем пред околу четири години, екосистемот не беше толку живописен како денес. Ситуацијата денес изгледа сосема поинаква, а ние веруваме дека дел од тоа е благодарение на Асоцијацијата Стартап Македонија. Драго ни е што успешно соработуваме со Стартап Македонија уште од основањето и ја продолжуваме нашата соработка и во иднина за успешен развој и раст екосистемот“ истакна Стефан Томаџан, заменик Шеф на Мисија, Амбасада на Швајцарија во Република Северна Македонија.

Од УСАИД активно работат на развивање на екосистемот во земјата и овозможија финансиска поддршка за пласирање на дигитална платформа.

„Проектот на УСАИД за развој на деловниот екосистем веќе две години интензивно работи на зајакнување на стартап заедницата во Северна Македонија. Затоа, на почетокот на 2019-та година преку грант ги поддржавме Стартап Македонија во развивање на нова дигитална платформа за поврзување на екосистемот и зајакнување на интерактивноста меѓу чинителите во стартап заедницата.  Секако, дигиталното поврзување е само еден сегмент од мозаикот, па затоа се надеваме дека MКstartups центарот, поддржан од Фондот за иновации ќе служи како идеален простор во кој Стартап Македонија ќе може да прерасне во вистинска чадор организација која ќе ги интегрира и развива активностите на сите чинители во стартап заедницата“ истакна Мирјана Македонска, директор на проектот на УСАИД за развој на деловниот екосистем.

Отворање на MKstartups Space 3

Стартап Македонија во април годинава објави Google Digest календар  кој постојано се ажурира со настани, обуки и активности наменет за сите кои се дел од стартап заедницата. Дигиталната платформа е во изработка и  до денеска на неа се регистрирани 100 стартап компании. Целта на оваа платформа која ќе е функционална до крајот на годинава, е да ги поврзе сите чинители на стартап екосистемот, не само во главниот град на нашата држава туку на регионално и на глобално ниво, а со тоа и да се поттикне и постепено да се помогне во развојот на стартап потенцијалот кај младите.

Избрано иновативно решение за повикот „ПристАПП транспорт“ на ФИТР

Иновативното решение на компанијата „Некстсенс ДОО“ е избрано како прворангирано на Јавниот повик за финансирање на проект за изработка на информациски систем за управување во областа на патничкиот и товарниот сообраќај финансирано од Фонд за иновации и технолошки развој (ФИТР), во соработка со Министерството за транспорт и врски на Република Македонија.

Одлуката ја донесе Комисијата за избор составена од Иван Чорбев, претставник од ФИНКИ, Драган Јовев, претставник од Министерството за транспорт и врски, Никола Николов, претставник од Министерството за информатичко општество и администрација, Александра Чавдаревска, претставник од МАСИТ и Тања Илијевска претставник од Фондот за иновации и технолошки развој.

Проектот „ПристАпп Информациски систем за управување во областа на патничкиот и товарниот сообраќај“ ќе овозможи стандардизација и дигитализација на секторите поврзани со превоз на стока и патници. Целта на новото софтверско решение е да обезбеди поефикасен и потранспарентен процес на издавање на различни видови на дозволи и документи за да се зголеми ефикасноста и работата на Министерството за транспорт и врски и да се понудат поквалитетни услуги во секторот транспорт.

Новиот систем ги опфаќа сите фази од постапката од електронското аплицирање во патничкиот линиски превоз, како и транспортот на стока, предвидени со Законот за превоз во патничкиот сообраќај, управување на постапките за одобрување решенија, па сѐ до издавање на лиценците и дозволите.

Истовремено, со ова системско решение трошоците за изработка на новиот софтвер и негово одржување ќе се намалат за 52% во однос на системот кој досега се применува.

Овој систем исто така ќе овозможи интеграција, стандардизација на податоци и процеси и зголемена комуникација меѓу инволвираните страни со цел да се постигне високо ниво на соработка и размена на податоци со останати системи од други институции. Системот ќе биде дел од националната платформа на интероперабилност.

Дополнително, како дел од ова решение ќе се создаде и Централен регистар на транспортери со информации за сите типови на транспортни компании, според нивните податоци и дејноста.

Проектот ќе трае девет месеци, а износот на доделениот грант од страна на ФИТР е 4,522,722.00 денари.

Со цел да се осигура квалитетот на проектот и ефикасна имплементација на издржано техничко решение кое ќе биде во полза на сите корисници на системот, ФИТР, Министерството за транспорт и врски и ФИНКИ ќе спроведуваат надзор на квартално ниво.

Проектот ПристАпп е дел од инцијативата на ФИТР за Примена на иновации во јавниот сектор преку кој треба јавните институции да станат поефикасни, потранспарентни и да понудат поквалитетни услуги за граѓаните.

Проектот „Развој на паметен фотоволтаичен модул (ФВ-ПАМ)“ на Торакс со поддршка од ФИТР

Проектот „Развој на паметен фотоволтаичен модул (ФВ-ПАМ)“ има за цел да прерасне во нов револуционерен производ од областа на енергетско-ефикасните фасади и покриви. Овој проект е на компанијата Торакс, која го спроведува во соработка со Факултетот за електротехника и информациски технологии – ФЕИТ преку новоформираниот Центар за трансфер на технологии и иновации, ИНОФЕИТ и компанијата Интебако.

„Во насока на зголемување на својата палета на производи од областа на енергетско-ефикасните фасади и покриви решивме да ја искористиме можноста што ја понуди ФИТР и да развиеме нов револуционерен производ кој се очекува да има големо влијание врз пазарот во иднина“, велат од компанијата Торакс.

Тие истакнуваат дека целта на проектот е развој на иновативен производ, паметен фотоволтаичен модул, кој во себе ќе интегрира најсовремени батерии и управувачка електроника.

„Фотоволтаичниот модул наречен ФВ-ПАМ, покрај стандардните карактеристики за производство на електрична енергија, ќе има можност да ја акумулира таа електрична енергија и поради нејзината управливост ќе има големи позитивни ефекти врз електро-енергетскиот систем. Исто така, директно може да се користи и како градежен материјал во покривните конструкции, без употреба на дополнителни материјали.“, истакнува во видеото претставникот на оваа домашна компанија.

Во изработката и развојот на ФВПАМ, покрај Торакс и Интебако, ќе учествуваат истражувачи, докторанти, магистранти и студенти од ФЕИТ, што очекуваме да биде најпозитивен пример за примената на современите истражувања во практиката во насока на развој на иновативни производи.

Компанијата Торакс е една од над 70 домашни компании/конзорциуми поддржани од Фондот за иновации и технолошки развој во рамките на првиот јавен повик од Планот за економски раст на Владата на Република Македонија.

Со првиот инвестициски бран се реализираат инвестиции во домашниот приватен сектор во износ од 20 милиони евра. Се ангажираат 460 лица, од кои 85 се нови работни места, со просечна плата од 48.000 денари.

Одржана инфо сесија за јавниот повик „#СтартАПувај“ во Тетово

Претставници на Фондот за иновации и технолошки развој (ФИТР) одржаа Инфо сесија за јавниот повик #Стартапувај во Тетово. Целта на овој јавен повик е финансиска поддршка на новоосновани старт-ап и спин-оф компании и е поддржан од Светска банка.

Линк и повеќе информации за повикот можете да најдете на следниот линк: fitr.mk/startapuvaj

Инфо сесијата се одржа во Центарот за развој на бизнисот на South East European University (SEEU) во Тетово и беше организирана во рамките на работната средба со Стопанската комора на Северо-западна Македонија и презентацијата на Планот за економски раст на Владата на Република Македонија.

На настанот учествуваа Зорица Апостолска, министерка без ресор задолжена за странски инвестиции, Неби Хоџа, претседател на Стопанската комора на Северо-западна Македонија, Академик проф. д-р Абдулменаф Беџети, ректор на УЈИЕ, Бисера Јордановска – претставничка на Фонд за иновации и технолошки развој (ФИТР), како и Иван Андревски – претставник на Кабинетот на министерката Апостолска.

Инфо сесија за „#Стартапувај“ минатата недела беше одржана во Битола.

Младите треба да бидат двигатели на економијата и општеството – На Макинова се одржа #ПетокЗаМлади во организација на ФИТР

Основци и средношколци ги презентираа своите иновативни проекти во рамките на програмата „#ПетокЗаМлади“ во организација на Фондот за иновации и технолошки развој. Оваа иницијатива на ФИТР која денеска се одржа по втор пат, има за цел стимулирање на креативното и критичкото размислување кај младите.

Креативната работилница за младинско творештво беше организирана како дел од манифестацијата Макинова која е поддржана од Фондот, а во рамките на саемот Технома. Срдношколците од неколку училишта од различни делови на Македонија работеа  на нивните иновации на работилниците организирани од страна на Сојузот на здруженија за техничка култура на Република Македонија – „Народна техника“. Меѓу другото, учениците од средните скопски училишта „Михајло Пупин“ и „Јосип Броз Тито“ кои беа наградени во рамки на „Предизвик за млади истражувачи“ на ФИТР исто така имаа можност да ги претстават своите проекти и да разменат идеи.

Петок за млади ФИТР во Макинова Технома 3

Во своето обраќање на почетокот на настанот, директорот на ФИТР, Јован Деспотовски, ја истакна важноста на организирањето на ваков вид работилници и иницијативи во поглед на овозможување континуирана поддршка и стимул за младите, како и развивање на критичкото мислење од најрана возраст.

„Фондот за иновации и технолошки развој продолжува со реализацијата на „Петок за млади“. Програма која е наменета за младите и ги става нив во фокусот. Целта е преку посебен вид програми и иницијативи да го поттикнеме развојот на критичкиот, иновативниот и креативниот потенцијал кај оваа популација,“ истакна Деспотовски.

Директорот на ФИТР ја посочи успешно реализираната програма „Предизвик за млади истражувачи“ која ФИТР годинава ја спроведе во соработка со Министерството за образование и наука. Само годинава, преку оваа програма е доделена финансиска поддршка за 20 основни и средни училишта со цел развивање на различен тип иновативни проекти.

„Денес, во рамките на настанот денес беа презентирани дел од решенијата кои произлегоа од тие проекти. Најавувам скорешно продолжување и распишување на нов повик од „Предизвикот за млади истражувачи“. Сакаме да дадеме шанса на младите со цел да ги поттикнеме да станат претприемачи и двигатели на економијата, како и на целото општество“, рече Деспотовски.

Петок за млади ФИТР во Макинова Технома 2

Учениците и посетителите имаа можност да ги видат проектите „Хигиена на забите со еколошка паста“ и „Теслини струи“ изработен од учениците од „Ацо Русковски“ од Берово, „Теслин трансформатор“ на учениците од средното училиште „Коле Нехнетин“ од Штип, проектот „Вертикален плотер“ на учениците од средното училиште „Јахја Кемал“ од Скопје како и  проектот на средното училиште „Михајло Пупин“ за изработка на оригинален 3Д принтер за кој користат посебна софтверска програма.

Меѓу проектите што беа изложени се и „Еко фрижидер“, „Еколошка соларна термоелектрана“, „Биоапсорбирачки васкуларен стент“, „Електроекономски уред“, „Машина за гравирање со ласер“ и други.

Проектот „Софтверска платформа за продажба на електронски книги“ на Книготека поддржан од ФИТР

Проектот „Софтверска платформа за продажба на електронски книги“ е на компанијата Книготека претставува развој на еден уникатен и целосно интегриран софтверски пакет за производство, продажба и дистрибуција на електронски книги што ќе овозможи на илјадници потенцијални купувачи и корисници – издавачки куќи од целиот свет да креираат сопствена и брендирана дигитална книжарница.

Книготека: „Софтверската платформа се состои од две основни компоненти, а тоа е апликација за читање на десктоп и мобилни уреди со максимално ниво на криптирана заштита на содржината, како и „бек офис“, односно позадинска канцеларија со високо развиена аналитика, која на издавачите ќе им овозможи комплетна контрола врз административното, финансиско и продажното работење.

Проектот ќе се спроведе во времетраење од две години. Во првата половина ќе биде изработен производот, како и неговата правна заштита, а потоа ќе следува неговата комерцијализација на светскиот пазар. Бидејќи се работи за исклучително скап и сложен истражувачки и развојно-технолошки процес, соработката со Фондот за иновации и технолошки развој и финансиската поддршка се од исклучително значење за развојот на овој проект.

Покрај тоа што проектот ќе придонесе за развојот на нови технологии, како и бенефит за самата компанија и нејзиното работење, ќе има и значајни општествени придобивки: зголемување на бројот на вработени, потоа пораст на животниот стандард, зголемување на извозот и прилив на девизни средства, генерален пораст на БДП, како и полнење на државната буџетска каса преку даноци и останати придонеси.“

Компанијата Книготека е една од над 70 домашни компании/конзорциуми поддржани од ФИТР во рамките на првиот јавен повик од Планот за економски раст на Владата на Република Македонија.

Со првиот инвестициски бран се реализираат инвестиции во домашниот приватен сектор во износ од 20 милиони евра. Се ангажираат 460 лица, од кои 85 се нови работни места, со просечна плата од 48.000 денари.

Проектот „ReadSpace“ на Кодвел и Издавачки центар Три со поддршка од ФИТР

Проектот Readspace на Кодвел и Издавачки центар ТРИ е платформа која е наменета за пазарот на електронски книги што ќе им помогне на издавачите тоа што веќе го имаат во форма на печатени книги, материјали и слично да го стават во електронска форма и да заработат.

„Подолго време работиме на овој продукт. Сега заедно со #ФИТР ни се овозможува нашиот раст да го забрзаме многу повеќе. Со оваа заедничка инвестиција да станеме лидери на пазарот на електронски книги кој многу добро се развива во регионот и цела Европа. Очекуваме дека ќе бидеме единствените кои на издавачите ќе им овозможат ова брзо и лесно да го направат без да треба да инвестираат големи дополнителни средства.“, велат од компанијата Кодвел.

„Се надеваме дека како резултат на оваа поддршка од ФИТР ќе успееме да ја направиме Македонија лидер токму на овој пазар на електронски книги и ќе успееме да се етаблираме како еден од врвните брендови за електронски книги како што е на пример Амазон.“, истакнува во видеото претставникот на оваа домашна компанија.

Кодвел и Издавачкиот центар „Три“ се една од над 70 домашни компании/конзорциуми поддржани од ФИТР во рамките нa првиот јавен повик од Планот за економски раст на Влада на Република Македонија

Со првиот инвестициски бран се реализираат инвестиции во домашниот приватен сектор во износ од 20 милиони евра. Се ангажираат 460 лица, од кои 85 се нови работни места, со просечна плата од 48.000 денари.