Огромен интерес кај стартап компаниите за финансиска поддршка од ФИТР

Во Фондот за иновации и технолошки развој беа презентирани првичните резултати по завршената административна проверка на пристигнати апликации на јавниот повик за инструментот Ко-финансирани грантови за новоосновани трговски друштва „старт-ап“ и „спин-оф“ – СтартАПувај, финансиран од ФИТР и Светска Банка.

Директорот на ФИТР, Јован Деспотовски потенцираше дека интересот за аплицирање е навистина голем, особено кај младите луѓе. Според податоците, на повикот аплицирале 186 компании, а побарани се пет пати повеќе средства од предвидениот буџет за инструментот кој изнесува еден милион евра.

Деспотовски нагласи дека позитивно е тоа што 91% од компаниите за првпат учествуваат на јавен повик организиран од страна на Фондот, како и тоа  дека дури 2/3 од компаниите што аплицирале не се постари од една година, а повеќе од 50% од нив се основани по објавата на јавниот повик.

“Она што особено не охрабрува е што сме успеале во намерата да ги поттикнеме младите да размислуваат покрај работа во јавен сектор или да си заминат од државата, да останат овде, да отворат свој бизнис и да аплицираат за поддршка во Фондот. Тоа ни беше и основната цел со овој повик, “ истакна Деспотовски.

Јован СтартАПувај 4

Најголем број предлог проекти се во ИТ индустријата, но застапени се и 20 други сектори како земјоделие, автомобилската индустрија, транспорт, економија, маркетинг и медицина. Исто така компаниите предвидуваат отворање на 409 нови работни места со просечна плата од над 30,000 денари.

Според Деспотовски дополнителен позитивен показател е податокот дека со овој повик се поттикнува женското  претприемништво во земјава, односно дури 35% од компаниите апликанти имаат жена управител или член на сопственичката структура.

„ Ова се показатели кои говорат дека сме успеале да ја придвижиме македонската стартап заедница и полека да ја менуваме свеста во земјава, особено кај младите, дека можат да креираат успешни бизнис приказни дома,“ заклучи Деспотовски.

Во тек е процесот на предселекција од страна на надворешни експерти,  по кој ќе следи финалната селекција која ја спроведува Комитетот за одобрување инвестиции на ФИТР, независно тело составено од странски експерти именувани од Владата на Р.М.  Се очекува целиот процес за биде заокружен за еден месец.

Јавниот повик беше отворен од 22.10.2018 година до 11.12.2018г.

#ОброкЗаСите – Лицата во социјален ризик ќе добиваат оброк преку нов иновативeн модел

Бездомниците коишто преноќуваат во прифатниот пункт Момин Поток во Скопје денеска добија оброк преку најдобро рангираното иновативно решение за искористување на вишоците храна избрано на јавниот повик „Предизвик за иновативно решение за обезбедување #ОброкЗаСите” на Фондот за иновации и технолошки развој (ФИТР) и Министерството за труд и социјална политика (МТСП).

Со иновативниот модел „Сите сити“ по неколку пати во неделата оброк ќе добиваат 3 различни категории на граѓани: лица кои имаат, или немаат можност за самостојна подготовка на храна и лица во социјален ризик, стари и изнемоштени лица, а храната ќе ја подготвуваат лица со попреченост.

Оброк за Сите Црвен Крст Момин поток  1

Министерката за труд и социјална политика Мила Царовска, најави дека со предложениот модел ќе се обезбедува храна за 3-4 пати повеќе граѓани отколку до сега, а „Сите сите“ и „Ајде Македонија“ е еден од начините преку кој ќе се развива социјалното претприемаштво коешто ќе нуди различни услуги за најаранливите категории граѓани.

„На овој начин преку вложување средства и искрена енергија се поттикнуваат позитивни промени во општеството. Министерството за труд и социјална политика подготвува Стратегија за создавање на социјално претприемништво како еко систем за развој на социјалните претпријатија во Македонија. Овие претпријатија ќе бидат од голема помош за државата, бидејќи ќе нудат социјални услуги на кои ќе биде купувач самата државата, но истовремено и ќе имаат обврска да вработуваат ранлива категорија лица со што ќе допринесат за процесот на инклузија на различните во општеството“, рече Царовска.

Директорот на Фонодт за иновации и технолошки развој, Јован Деспотовски рече дека социјалните иновации се тренд што го воведуваме во Македонија.

„Со проектот Оброк за сите ќе овозможиме креирање на нов систем за помош за оние наши сограѓани кои имаат реална потреба. Новиот систем ќе се заснова на поефикасно искористување на сите вишоци храна што во моментот, за жал завршуваат на отпад. Во Македонија 30% од храната се фрла што ја става на високото осмо место во светот на земји кои фрлаат храна според бројот на жители. Во периодот што следи, Фондот ќе реализира повеќе други иницијативи во делот на социјалните иновации “, изјави Деспотовски.

Оброк за Сите Црвен Крст Момин поток  3

Иновативниот модел освен достава на храна предвидува и кампања за подигнување на свеста на компаниите и граѓаните, креирање на прирачник за безбедна употреба на вишоците на храна, но и воведување на иновативна веб платформа која ќе ги поврзува бизнисите и граѓанските организации. Меѓу другото, вишоците на храна ќе се објавуваат на веб платформата и истите ќе може навремено да се превземана од граѓанските организации, со планирање на количини, лица и време на подигнување на храната.

Решението го изготвија неколку непрофитни организации предводени од „Ајде Македонија!“ и нивните партнери, националниот Црвен Крст на Р.М., Здружението за испитување материјали и развој на нови технологии АД (ЗИМ) и Дама-Л“ кое работи со лица со попреченост со што се поттикнува и развојот на социјалното претприемништво во Македонија преку инклузија на лицата со посебни потребни.

Иновативниот модел чија вкупна вредност изнесува околу 2 милони денари оваа година ќе се пилотира на подрачјето на Куманово, Прилеп и Скопје, а планот е понатаму да стане системско решение низ цела Македонија.

Оброк за Сите Црвен Крст Момин поток  4

ФИТР остро реагира на изнесените невистини на денешната прес конференција на политичката партија ВМРО ДПМНЕ

Компанијата „Билд“ не е корисник на средства од Фондот за иновации и технолошки развој, ниту пак се исплатени било какви средства на истата. За оваа компанија, Комитетот за одобрување на инвестиции, што е независно тело, составено од меѓународни експерти, има донесено одлука за финансиска поддршка во јули 2018 година., но постапката за потпишување на договор од страна на Фондот со оваа компанија е запрена. Во самата постапка пред потпишување на билокаков договор, што ја води Фондот, целосно се применуваа и ќе се применуваат сите одредби од регулативата за спречување на судир на интерес, без исклучок.

Дополнително, споменатото лице Неда Икономова – Гавриловска ниту била ангажирана, ниту може да биде ангажирана во било која фаза од евалуација и одлучување за доделување на финансиска поддршка од страна на Фондот, било како надворешен соработник или како вработен. Истото, од причина што Фондот применува системско решение за превенција од влијанија, преку двостепен систем на оценка и одлучување, во кој се вклучени надворешни домашни и странски експерти, што се ангажираат на јавен оглас. Вработените во Фондот за иновации и технолошки развок, директорот и членовите на Управниот одбор се целосно исклучени од процесот на одлучување.

Имајќи ги предвид овие факти, останува дилемата зошто на политичката партија ВМРО ДПМНЕ и пречи финансиската поддршка за инвестиции на над 140 домашни микро, мали и средни компании што Фондот ја реализира во транспарентни постапка и однапред објавени критериуми во 2018 година. За реализација на инвестициските проекти, сите домашни компании вложуваат сопствени средства од 40% и ќе ангажираат над 800 лица, за кои ќе исплатат двојно поголема плата од просекот во земјата.

ФИТР: Дечиња изработија новогодишни украси за хуманитарни цели

Стотина дечиња од ОУ„Димитар Миладинов“ од Скопје, штитеници од Домот за деца без родители „11 Октомври“, Домот за деца со воспитно социјални проблеми „25 Мај“, под менторство на студентите од Факултетот за дизајн и мултимедија од универзитетот ФОН изработија новогодишни украси, честитки и слики во хуманитарната „Работилница за изработка на новогодишни декорации“ која е дел од инцијативата „Петок за млади @ФИТР“.

Во работилницата, министерката за труд и социјална политика Мила Царовска и министерот за здравство Венко Филипче и директорот на ФИТР, Јован Деспотовски, се заедно изработија различни видови новогодишни украси и декорации кои потоа по пат на аукција ќе се продаваат во хуманитарни цели.

петок за млади 2 фото

„Сите овие дечиња денеска навистина се потрудија да направат убави новогодишни украси и слики кои ќе ги понудиме на јавна аукција. Сите собрани средства ќе бидат ставени на посебна сметка и ќе им бидат донирани за приоритетните потреби во здравството и социјала,“ изјави Јован Деспотовски, директорот на ФИТР.

Министрите Царовска и Филипче се заблагодарија на ваквата иницијатива и за учеството во оваа работилница.

Фондот продолжува со одржување на иницијативата „Петок за млади @ФИТР“ со цел да им обезбеди на младите поинаква средина од вообичаените училници и да ги поттикне да размислуваат критички и креативно, во насока на развивање сопствени вештини и знаења, но и да се поттикне свеста за социјална одговорност и поддршка на ранливите категории граѓани.

Петок за млади 1 фото

Подолжува силната поддршка на конкурентноста на приватниот сектор

Министерката без ресор задолжена за странски инвестиции, Зорица Апостолска и претставник на Фондот за иновации и технолошки развој (ФИТР) на 07.12.2018 година реализираа работна средба со претставници на бизнис заедниците од општините Делчево, Берово, Македонска Каменица и Пехчево.

Стопанствениците од овој регион, на средбата која се одржа во општина Делчево, се запознаа со владините мерки за стимулирање на вложувањата на домашните компании во нови проекти и технолшки развој, во проширување на производствените капацитети, во градењето на деловни релации со успешни странски комапнии, како и во освојувањето на нови пазари. Беа претставени и инструментите за поддршка на технолошкиот развој кај микро, малите и средните компании, кои се реализираат преку Фондот за иновации и технолошки развој, како и актуелните повици за финансиска поддршка на новоосновани старт-ап и спин-оф компании.

Од страна на ФИТР беа презантирани условите за кофинансирање по инструментите за поддршка во рамки на третиот столб од Планот за економски раст и актуелниот повик по инструментот – Кофинансирање на новоосновани трговски друштва старт ап и спин оф.

„Конкретизацијата на намерите на Владата на Република Македонија за стимулирање на нови инвестициски циклуси во стопанството, се реализираше со потпишувањето на Договори за државна помош со 100-тина компании, кои ги препознаа економските перспективи кои ги отворивме со Планот за економски раст. Овие компании до 25 декември годинава, согласно Законот за финансиска поддршка на инвестициите, може да ја очекуваат исплатата на финансиската поддршка за реализираните инвестиции во 2017 година“, рече министерката Апостолска, притоа нагласувајќи дека Владата и наредната годината продолжува со активно спроведување на овие мерки.

„И  наредната година подолжуваме со силната поддршка на конкурентноста на приватниот сектор. Во Буџетот за 2019 годна предвидовме за 37% повисока финансиска поддршка за инвестиции. Ќе добиете силна поддршка во вашите напори за освојување на нови пазари, за воведување на иновативни елементи во вашата дејност, за креирање на нови и добро платени работни места, технолошкиот развој и истражувањата кои ќе ги ставите во функција на развој на вашите компании исто така ќе бидат поддржани“, порача министерката Апостолска.

Потпишан меморандум за соработка за промоција на стручното образование во Македонија – стручните занимања нудат стабилно вработување и солидни плати

Денес во Владата на Република Македонија, потпишан е Меморандум за соработка за заедничка медиумска кампања за промоција на стручните занимања и стручното образование, чија главна цел е јакнење на свеста за значењето на овој тип образование и занимања, како и нивна промоција кај младите луѓе и нивните родители. Меморандумот во име на Владата го потпишаа министерката за труд и социјална политика, Мила Царовска, министерот за образование и наука, Арбер Адеми и директорот на Фондот за иновации и технолошки развој, Јован Деспотовски, како и претставници на проекти кои се спроведуваат со поддршка на УНДП, УСАИД и Швајцарската агенција за соработка.

Вицепремиерот за економски прашања, Кочо Анѓушев подвлече дека Владата активно работи на сите сегменти за поддршка на стопанството, најпрвин преку обезбедување на стабилна бизнис клима и обезбедување на висок степен на владеење на правото, како и за финансиска поддршка на компаниите.

„Многу важен елемент за компаниите е обезбедување на соодветен, стручен и професионален кадар. Тука се соочуваме со два проблеми. Првиот проблем е образовниот систем кој не соодветствува со реалните потреби и многу години наназад стимулираме образовен систем кој креира кадар кој не може да ја реализира својата практична примена во реалната економија. Имаме многу универзитети, во главно гимназиски средношколски систем кој промовира универзално знаење коешто е главно неприменливо по завршувањето на образованието, а оттука натаму имаме премногу универзитети кои креираат кадри кои не може да ја најдат својата иднина. Работиме да ја надминеме оваа ситуација на два начини, преку итни мерки како што е преквалификација, преобука, дообука на кадри за потребите на реалниот сектор, но и со системски мерки кои подразбираат создавање на професионални средни стручни училишта и реформа на системот на високо образование Ќе работиме на тоа да ја подигнеме свесноста кај учениците и родителите, дека со квалитетно стручно образование ќе имаат квалитетно и стабилно вработување“, нагласи вицепремиерот Анѓушев.

Потпишување на Меморандум соработка за промоција на стручното образование во Македонија Анѓушев и Царовска

Министерството за труд и социјална политика, како креатор и имплементатор на политиките, проектите и мерките за намалување на невработеноста, го зазема централното место во реализација на Меморандумот за соработка. Министерката Мила Царовска  потенцираше дека е задоволна со одличната реализација на мерките од Оперативниот план за поддршка на вработувањето во 2018 година.

„Во 2018 година имаме реализација од над 90% на мерките предвидени со Оперативниот план, што значи дека се одлично конципирани и осмислени. За 2019 година имаме рекордна 1 милијарда денари за преквалификација. Со тоа сметам дека ќе го подобриме недостигот на стручен кадар во Македонија. Исто така Законот за социјална заштита ќе биде само појдовна точка за намалување за сиромаштијата бидејќи само преку вработување се излегува од сиромаштија. Со социјалната реформа ќе се работи на активација на пазарот на труд на лицата кои се корисници на социјална помош, а се работоспособни“, додаде Царовска.

Министерот за образование и наука, Арбер Адеми, истакна дека активно се работи на повеќе аспекти за подобрување на образовниот процес.

„Да го потенцирам најважниот факт поврзан со изборот на средно стручно образование, а тоа е дека овој тип на образование обезбедува најголема веројатност веднаш по завршувањето на соодветниот степен на образование, поединецот да си обезбеди работен ангажман и да го материјализира знаењето. Потребата од стручен кадар е голема во моментов и во иднина таа уште повеќе ќе се зголемува. Така што, оваа кампања за која денес потпишуваме меморандум е и повеќе од значајна. Ние во моментов навистина многу сме заложени и работиме да го унапредиме квалитетот на стручното образование и обука, но потребно е сите тие позитивни промени, можностите и придобивките кои произлегуваат од нив во текот на образовниот процес, но и по неговото завршување, да ги презентираме и да ги доближиме до младите и воопшто до граѓаните“, истакна Адеми.

Амбасадорката на Швајцарија, Н.Е. г-ѓа Сибил Сутер, подвлече дека Швајцарија силно ја поддржува Македонија во реформскиот процес.

“Швајцарија е добро позната по своето стручно образование и обука. Важна лекција што ја научивме е дека треба постојано да го подобруваме системот за стручно образование и обука, да се прилагодуваме на динамичната економија. Силно веруваме дека ангажирањето на приватниот сектор во стручното образование и обука е од витално значење и за производство на квалификувана работна сила и за приватни компании да бидат конкурентни на меѓународните пазари”, кажа амбасадорката Сутер.

„Со кампањата што ја промовираме денес даваме придонес кон менување на свеста и приоритетите, особено кај младите. Шансата да ја препознаат дома, во Македонија, преку стручно образование, а потоа и усовршување. ФИТР веќе реализира ваква програма, со која се обезбедуваат до 1 милион денари за стручно усовршување во странство. Посебен, важен сегмент, останува поттик за развивање на свој бизнис, со развој и примена на нови технологии“, рече Јован Деспотовски, директорот на Фондот за иновации и технолошки развој, кој ќе биде активен учесник во кампањата.

Потпишување на Меморандум соработка за промоција на стручното образование во Македонија

Еден од потписниците на меморандумот е „Проектот на УСАИД за развој на деловниот екосистем“, а во име на потписникот и американската амбасада се обрати директорката на програмската канцеларија на УСАИД, г-ѓа Ненси Годфри.

„Дел од решението за недостатокот на стручната работна сила е промоција на стручните занимања како прв избор. Со тие вештини младите можат да бидат и претприемачи. Да се биде стручен столар, механичар, заварувач или фризер, тоа претставува можност за самовработување или за отпочнување на мал бизнис. Истовремено, им овозможува на работниците да имаат поголема моќ во преговорите со работодавците, ако се одлучат за таква кариерна патека“, додаде Годфри.

Во име на УНДП, меморандумот го потпиша в.д. раководител на канцеларијата во Македонија,  г-дин Зоран Самарџиев.

Македонскиот стартап Свифт Дата меѓу седумте најдобри на Саемот за вселенски иновации во Хјустон

Фондот за иновации и технолошки развој (ФИТР) го поддржа учеството на тимот Свифт Дата на SpaceCom самитот кое беше во организација на Њуменс Бизнис Акцелераторот.

Македонскиот стартап Свифт Дата кој работи во областа на обновливите извори на енергија успешно се пласираше меѓу 7те најдобри на финалето на Светскиот Натпревар за Вселенски Иновации – SpaceCom Google Entrepreneur Challenge кој минатата недела се одржа во Хјустон, САД. Тимот беше награден со кредити од Google за бесплатно развивање на своето решение на Google Cloud и користење на алатките за вештачка интелигенција. Натпреварот го водеше Извршниот директор на Global Entrepreneurship Network, Стефан Реки.

NASA Center 1

Тимот оствари значајни контакти со инвеститори од неколку финансиски фондови (Starbridge Venture Capital, Hypergiant, TechStars, NewCap Partners, Ubiquity Ventures) со кои ќе има можност за повторен контакт по унапредувањето на нивниот иновативен продукт кој засега е во фаза на прототип. Тимот доби конкретни насоки од експерти во областа за доразвивање на продуктот за поширока примена на Земјата, и негово приспособување за решавање на проблемот со недостатокот на енергија за време на ноќите на Месечината кои траат по 2 недели, каде се планира изградба на база и живеалишта за астронаути.

Продуктот на Свифт Дата ја мери количината на сончева енергија на дадено подрачје и со 98% сигурност ја проценува исплатливоста на инвестицијата во соларна енергија, со што овозможува избор на идеалната локација за поставување на фотоволтаици преку користење на сензори. Може да се користи и од страна на компании или домаќинства, но и за големи стратешки проекти на државно ниво.

NASA Center 3

Во рамки на престојот во Хјустон тимот го посети и Џонсон Спејс Центарот на НАСА специјализиран за мисиите со астронаути, и можеше во живо да види како изгледа Центарот за контрола на вселенските мисии, а посебно комуникацијата со тричлениот екипаж на Меѓународната Вселенската Станица и како се решаваат предизвиците.

Членовите на Свифт Дата како матуранти победија на натпреварот NASA Space Apps Challenge во Република Македонија во 2017 година, по што ја основаа својата стартап компанија и паралелно со факултетските обврски во континуитет работат на развој и унапредување на нивниот производ. Тие се пример како младите луѓе со посветеност и работа можат да бидат препознаени и на светската стартап сцена дури и од Македонија.

Деспотовски на регионална конференција Innovation Talk 2018: Македонија во 2018 година за 12 пати ја зголеми поддршката за иновации

Директорот на Фондот за иновации и технолошки развој (ФИТР), Јован Деспотовски, учествува на Innovation Talk 2018 – регионална конференција за технолошки иновации која се одржува во Белград.

На панелот „Иновации-поглед од Балканот“, Деспотовски заедно со министрите задолжени за иновации, наука, истражување и технологија на Србија, Босна и Херцеговина, Република Српска и Словачка, зборуваа за улогата на државата во развојот на иновациите и подобрувањето на бизнис екосистемот. Директорот на ФИТР ги претстави активностите кои ги презема македонската влада за поддршка на иновациите во земјата, нагласувајќи дека владата годинава за 12 пати ги зголемила инвестиците во овој сектор во однос на претходните три години вкупно.

Despotovski_InnovationTalk18_02

„Нашата политика е дека иновациите се применливи секаде и сакаме да ги поттикнеме сите кои имаат иновативни идеи да ги претворат во успешни бизнис приказни. Она што ни недостасува е креирање на критична маса успешни примери со кои покрај државата која е важен фактор, ќе се охрабрат и приватните инвеститори да вложуваат пари во иновативни проекти,“ изјави Деспотовски.

Сите соговорници на дебатата се согласија дека е потребна промена на менталитетот и кај компаниите и кај инвеститорите за побрз и поефикасен развој на економијата, како и дека иднината е кај младите луѓе.

„Апетитот за преземање ризик во бизнисот е сѐ уште мал, особено кај младите луѓе. Преку разни програми работиме на тоа да им се развие критичкиот начин на размислување уште од мали нозе и да се научат да преземаат ризик, да се поттикнат своите бизинис идеи да ги реализираат дома, а не да ја бараат својата иднина надвор. Бидејќи само со преземање на ризик може да се направи значаен чекор напред, ризикот е шанса не само опасност,“ нагласи Деспотовски.

Учесниците на министерскиот панел се согласија дека регионот има голем потенцијал кој сѐ уште не е докрај искористен и дека за да се оди побрзо напред потребна е поголема регионална соработка.

Despotovski_InnovationTalk18_03

Директорот на ФИТР оствари и билатерални средби со Ненад Поповиќ, министер за иновации и технолошки развој на Р. Србија и со Ален Шераниќ, министер за наука и технологија на Република Српска. На средбата со министерот Поповиќ се разговараше за институционалната поставеност и искуството на Србија во делот на иновации, а беа разгледани и можностите за регионална соработка.

На конференцијата учествуваат истакнати регионални и локални експерти од јавни и меѓународни компании кои дебатираат на различни панели меѓу кои се: паметни градови, индустрија 4.0, технологија на иднината и соработка меѓу корпорации и иновации. Учесниците на конференцијата имаат можност да се запознааат со најновите трендови во областа на иновациите и нивна примена во општеството и економијата, како и со потенцијалите за користење на нови технологии во бизнисот, начинот на кој истите ги менуваат традиционалните индустрии, како и кои се националните рзвојни политики во областа.

Foto 1

Целта на настанот е на едно место да  се соберат сите релевантни актери од иновативниот екосистем на регионот како придонес кон отворање на нови можности за соработка во регионот.