Ученици од „Песталоци“ поддржани од ФИТР освоија 3 златни медали на светски натпревар во Хаг

Петтоодделенци од скопското училиште „Јохан Хајнрих Песталоци“ освоија три златни медали на светскиот натпревар во дебата и критичко размислување World Scholar’s Cup, кој се одржа во Хаг, Холандија. Во конкуренција од 1.900 ученици од 51 земја, Виктор Јакимов, Сара Кнежевиќ и Лука Вајевиќ, предводени од менторката Билјана Стојаноска, наставничка по англиски јазик, постигнаа врвни резултати. Учеството на светскиот натпревар го поддржа Фондот за иновации и технолошки развој.

Наставничката Стојаноска испрати порака до Фондот:
– Ви се обраќам по втор пат, овој пат не со молба за помош, туку со огромна благодарност за искуството што ни го овозможивте. Во делот јуниори ние бевме единствениот тим од Македонија, составен од тројца исклучителни ученици од петто одделение. Се вративме со три златни медали, награда за најмлад тим во групата јуниори, но и со незаборавно искуство – вели Стојаноска.

Таа раскажува за дружбите со ученици од училиште за талентирани деца од Виетнам, од британски училишта од Африка, споделувале искуства со администратори на училишта од Грузија и од Украина кои присуствувале на натпреварот за да разгледаат и применат добри практики во своите училишта.

– Ги видовме космополитскиот дух на Канаѓаните на дело, професионалноста на Турците, студиозната посветеност на Индијците и Кинезите, беспрекорната организација и љубезноста на Американците… Учеството на натпреварот беше огромно искуство за нашите ученици. Тие имаа можност да се запознаат со една многу поконкурентна средина и да се натпреваруваат со деца со одлични вештини за комуникација – објаснува Стојаноска.

Менторката, до своето писмено обраќање до ФИТР додава дека ова било огромен предизвик за нив, за натамошно подобрување на нивните вештини (зголемување на капацитетот за дебата, подобрување на критичката мисла, стимулирање на натпреварувачкиот дух и сл.) кои ќе им користат во нивниот понатамошен образовен процес и позитивно ќе влијаат врз развојот и стимулирањето на нивниот талент.

Со поддршка од ФИТР, „Михајло Пупин“ стана прво средно училиште што доби фотоволтаична централа

Заменикот на претседателот на Владата задолжен за економски прашања, Кочо Анѓушев, заменикот министер за животна средина и просторно планирање, Јани Макрадули, градоначалникот на град Скопје Петре Шилегов, директорот на Фондот за иновации и технолошки развој, Јован Деспотовски и градоначалникот на Гази Баба, Борис Георгиевски, присуствуваа на свеченоста со која се одбележи патрониот празник на средното електро техничко училиште Михајло Пупин, во чии рамки свечено беше пуштена во употреба фонопонска електрана со инсталирана моќност од 12 киловати.

Во своето обраќање пред присутните, вицепремиерот Анѓушев потенцираше дека од инсталираната фотонапонска електрана во СЕТУ „Михајло Пупин“ има повеќе придобивки, а како најзначајна издвои дека оваа електрана ќе овозможи стекнување на практични знаења и искуства на учениците за функционирање на обновливите извори на енергија, кои се иднината на нашата држава, што ќе биде од особено значење за понатамошната едукација, но и практична примена.

„Средните технички училишта, како што е и СЕТУ Михајло Пупин го едуцираат кадарот за идниот побрз развој на македонската економија. Ме радува трендот на зголемување на запишани ученици во ова училиште. Како за споредба, во 2016 година, во прва година имаше запишано само 94 ученици, додека оваа учебна година се запишани рекордни 256 ученика. Тука за прв пат е воведен и концептот на дуално образование,односно учење преку работа, најпрвин со паралелката и со поддршка од ЕВН, а од оваа година соработката се зголеми со уште пет домашни компании, кои поддржаа формирање на уште една дополнителна паралелка. „Михајло Пупин“ е добар пример за зголемување на трендот на ученици во средните технички училишта, како и за имплементација на дуалното обрзование. Очекуваме нивото на техничките училишта да биде дополнително подигнато со цел образовниот систем да биде прилагоден за побрз и одржлив економски развој“, посочи вицепремиерот Анѓушев.

Градоначалникот на Град Скопје, Петре Шилегов, истакна дека инсталираната фотофолтаична централа е прв ваков пример во било кое средно училиште во Република Северна Македонија, а проектот е доказ дека добрата соработката помеѓу централните и локалните власти може да вроди со сериозен квалитет и иновативност.

„Идејата за проектот е од учениците од самото училиште, а е финански поддржана од Фондот за иновации и технолошки развој, како и од градот Скопје и претставува одличен пример како едно средно училиште може да биде пионер и да воведе една мини револуција во пристапот кон заштита на животната средина и енергетската ефикасност. Ова училиште треба да ни послужи како позитивен пример, за однесувањето на останатите институции на локално и централно ниво, но и за сите други училишта, како можат не со толку многу пари да придонесат за заштитата на животната средина и подобрување на финансиските перформанси на самата институција“, потенцира Шилегов.

Фотонапонската електрана е со инсталирана моќност од 12 киловати, покрива околу 80% од потрошувачката на енергија на СЕТУ Михајло Пупин, а дел од финансиските средства и иницијалната идеја се поддржани и обезбедени преку грант од Фондот за иновации и технолошки развој во висина од 270 илјади денари.

„Денес веќе зборуваме за резултати од активностите и поддршката на Фондот во изминатите 24 месеци. Проектот на којшто овие млади луѓе работат е конкретен показател дека државата застанува позади нив и обезбедува целосна поддршка. Резултатот од проектот е пак показател дека оваа поддршка младите луѓе целосно ја заслужуваат и ќе ја имаат и понатаму. Во овој момент, уште 53 други основни и средни училишта работат на проекти во енергетиката, земјоделието, машинството, ИТ и други области. Уште 300 и повеќе микро, мали, средни и големи македонски компании работат на инвестициски проекти поддржани од Фондот и Владата. Од ова место сакам да им порачам на младите луѓе да сметаат на нашата поддршка и понатаму“, порача во оваа прилика директорот на ФИТР, Јован Депотовски.

Директорот на СЕТУ Михајло Пупин Димитар Ѓеорѓиев, се заблагодари за поддршката од Фондот, Владата и Градот Скопје за финансиската поддршка на овој проект, при што истакна дека се надева дека ова ќе биде добар пример и водилка и за другите училишта да имплементираат вакви проекти, со кои позитивно се влијае на животната средина и заштедата на енергија.

„Петок за млади @ФИТР“ – „Забрзан курс“ за аплицирање на меѓународен хакатон на НАСА

Предизвици поврзани со вселенски истражувања, како да се аплицира на меѓународен НАСА хакатон и како да се направи интерактивна видео игрица – со овие теми започна новиот серијал настани „Петок за млади @ФИТР“ кој втора година по ред предвидува активности за поттикнување на креативните вештини и иновативноста кај младите.

Над 70 средношколци има можност да ги слушнат деталите за предизвиците поврзани со вселенски истражувања и подобрување на животот на Земјата, начинот на аплицирање како и дел од искуствата на претходни учесници во пресрет на меѓународниот хакатон на НАСА – “NASA Space Apps Challenge“ што ќе се одржи од 18ти до 20ти октомври во Скопје, во организација на Њуменс бизнис акцелератор.

Петок за млади @ФИТР_NASA Space App Challenge 2

Учесниците на NASA Space Apps Challenge 2019 ќе имаат можност да бидат менторирани и оценувани од страна на претставници на вселенските агенции и експерти од корпорации во конкретната област. Трите победнички тима на NASA Space Apps Challenge пак се пласираат за директно учество во натпреварот за стартап компании кој ќе се одржи во рамките на Space Tech Convention 2019, каде што добиваат можност да ги убедат меѓународни инвеститори да ги поддржат нивните идеи. Уште повеќе, тимот кој ќе се пласира на прво место на локацијата во Скопје добива награда – патување во Kennedy Space Center во Флорида и ќе има можност да присуствува на лансирање на ракета.

Патот од идејата за развивање 3D интерактивна игра во која играчот е соочен со географски проблеми, гејмификацијата како начин да се решат предизвиците од хакатонот и менаџирањето на успешен стартап им го претстави Кристијан Трајковски, еден од менаџерите на компанијата Dark-1 – една од стартап компаниите кои добија финансиска поддршка од ФИТР. Трајковски кој исто така учествувал на предизвиците на НАСА споделувајќи го своето искустви посочи дека е најважно игрите да имаат едукативен карактер и ги поттикна младите кои љубопитно го следеа секој негов збор да преземат конкретни иницијативи.

Петок за млади @ФИТР_NASA Space App Challenge 3

„Доколку имате супер идеа и верувате во неа, пробајте. Со помош на постарите направете бизнис план и обидете се. Има институции, како ФИТР кои ќе ви помогнат таа да стане успешна реалност.“, вели Трајковски.

Средношколците, поделени во групи имаа можност и практично да испробаат со какви задачи би се соочиле на НАСА хакатонот. Како што велат, за голем дел од нив ова би било тежок предизвик кој вреди да се проба.

Инаку, иницијативата „Петок за млади @ФИТР“ е дел од активностите на Фондот насочени кон поттикнување на критичкото и креативното размислување, и развој на иновативноста и претприемништвото кај младите. ФИТР неодамна ја презентираше и предлог програмата „Фонд за млади умови“ која треба да ги опфати сите постоечки иницијативи и да креира системско решение со кое државата во иднина ќе вложува во развивање и поддршка на таленти кај младите.

Петок за млади @ФИТР_NASA Space App Challenge 4

Во изминатите 18 месеци ФИТР вложи околу 15 милиони денари во три различни програми наменети за поддршка на младите, во кои учествуваат над 500 основци и средношколци, додека 54 основни и средни училишта реализират проекти за истражување.

ФИТР достави до Владата иницијатива за поедноставување на пристапот на компаниите до финансиска поддршка, преку измени на Правилникот за инструментот за поддршка – кофинансирани грантови за технолошки развој

Измените се состојат од воведување на скратена (fast track) постапка за аплицирање за компании што веќе учествувале на јавни повици на Фондот, а кои ги поминале фазите на административна проверка и претселекција. Конкретно, секоја компанија што добила соодветни забелешки и препораки од Комитетот за одобрување на инвестиции на Фондот во последна фаза ќе може да достави ист односно подобрен проект на следен јавен повик користејќи ја скратената процедура. Ова право се однесува за сите јавни повици на Фондот објавени во период од 12 месеци од добиеното известување на компанијата од Комитетот на претходен јавен повик.

Со скратената постапка се намалуваат трошоците за компаниите, но и на Фондот и значително се намалува времето од аплицирање до одлука на Комитетот за одобрување на инвестиции. Во практика, од досега потребните 60 – 90 денови (зависно од број на пристигнати апликации) постапката за компаниите што ре-аплицираат со ист или подобрен проект би траела двојно помалку.

Со измените предвидено е компаниите што аплицираат да достават и задолжителен План за транспарентност и комуникација со јавноста, со што дополнително ќе се зајакне видливоста на инвестицијата, но и резултатите од проектите.

Согласно предложените измени во Среднорочната програма за работа на Фондот, нови јавни повици по новиот правилник, во скратена и редовна постапка (за нова апликанти) се очекуваат веднаш по неговото усвојување од Владата.
Предложените измени ќе се пресликаат и во останатите инструменти на Фондот, ко-финансирани од Владата и Светската банка.

Меѓународен оглас за избор на двајца членови на Комитетот за одобрување на инвестиции

Фондот за иновации и технолошки развој (ФИТР) распиша меѓународен оглас за избор на двајца членови на Комитетот за одобрување на инвестиции. Огласот претставува редовна и транспарентна постапка која се прави поради истекот на двогодишниот мандат на двајца од вкупно пет членови на Комитетот, Глигор Ташковиќ и Авинаш Сахи.

Комитетот за одобрување на инвестиции го сочинуваат 5 членови, кои се избрани и именувани од страна на Владата на Република Северна Македонија. Комитетот ги разгледува и ги одобрува предлог-проектите доставени до него за сите инструменти за поддршка на Фондот. Членовите на Комитетот се избираат од редот на експерти со најмалку десетгодишно меѓународно искуство во областа на инвестициите во иновациската дејност.

Линк до огласот: https://jobs.economist.com/job/22084/committee-members/

Повеќе информации за организациската поставеност на Фондот, составот и надлежностите на Комитетот се достапни на следниот линк: http://www.fitr.mk/portfolio-item/%D0%BD%D0%B0%D1%88%D0%B0%D1%82%D0%B0-%D0%BE%D1%80%D0%B3%D0%B0%D0%BD%D0%B8%D0%B7%D0%B0%D1%86%D0%B8%D1%98%D0%B0/

Креираме можности со цел младите да започнат свој бизнис и да останат дома – „Demo Day“ на „X Фактор Акцелератор“ во Велес

Одржан „Demo Day“ на „X Factor Accelerator“ од Велес – Презентирани бизнис идеите на 8 стартап тимови од првиот инвестициски циклус пред Комитетот за одобрување инвестиции.

„Demo Day“ е финален настан од првиот инвестициски циклус, во кој можноста за аплицирање ја искористија 50 апликанти. Од нив, низ процесот на евалуација кој финишираше со испорака на интензивна тримесечна предакцелераторска програма, беа селектирани овие 8 стартап тимови за учество на претстојниот Demo Day.

Demo Day“ на „X Factor Accelerator“ од Велес 2

Директорот на ФИТР, Јован Деспотовски пред почетокот на настанот рече дека државата почна да ги поттикнува младите луѓе да го развиваат својот креативен потенцијал.

„Акцелераторот е еден одличен пример за ова што го зборувам. Ако пред две години зборувавме со „ќе“, за некое идно време, денеска зборуваме за нешто што се случува. Драго ми е што гледам се повеќе млади луѓе со стартап идеи“, рече Деспотовски.

Тој додаде дека очекува и нови партнери да се придружат во креирање на повеќе можности со цел младите да започнат свој бизнис и да останат во дома. Нашата земја ги следи практиките на развиените економии и постепено станува место со широки можности за младите луѓе, посочи Деспотовски.

Акцелераторот во Велес е поддржан од Фондот за иновации и технолошки развој во соработка со Светска банка, а преку инструментот за поддршка – кофинансирани грантови за воспоставување, работење и инвестиции на деловно – технолошки акцелератори.

Demo Day“ на „X Factor Accelerator“ од Велес 3

Исто така, во рамки на глобалната „Недела на ретприемништво“ заедно со Универзитетот „Гоце Делчев“ од Штип и со поддршка на „Стартап Македонија“, X Factor Accelerator организира серија на настани со цел младите и студентите да бидат подобро информирани и поттикнати за учество во програмите и мошностите што им се нудат преку стартапи во нивната родна земја.

„Оброк за сите“ е социјална иновација која почнува да дава видливи резултати

Во рамки на пилот проектот „Оброк за сите“ кој го спроведува организацијата „Сите Сите – Ајде Македонија“ заедно со своите партнери, а е поддржан од Фондот за иновации и технолошки развој и Министерството за труд и социјална политика, се доставува храна за бездомниците во Момин поток. Храната се доставува секоја среда во изминатиот период, дополнето со поголеми количини кои опслужуваат и други кујни. Во рамки на проектот се пилотира и модел за дистрибуција на прехранбени пакети до социјално загрозените граѓани во Скопје, Куманово и Прилеп. А волонтерите на Црвен крст, двапати во неделата дистрибуираат топол оброк за 10 стари лица до нивните домови.

Со ова иновативно решение за обебедување и подготвување на оброци за лица во социјален ризик се прибираат информации кои ќе помогнат за потенцијално подобрување на дел од постоечките програми за поддршка на социјално загрозените граѓани со храна.

Иновативниот модел на „Оброк за сите“ чија вкупна вредност во пилот фазата изнесува околу 2 милони денари е финасиран од ФИТР и планот е понатаму да почне да се применува низ целата држава, информираат од организацијата „Ајде Македонија – Сите сите“.

Дополнително, целта на „Сите сити“ е значително да го намали бројот на гладни граѓани, кои не може да си ги дозволат сите оброци во текот на денот, како и да станеме земја во која добрата храна не се фрла.

Нашата држава е во високите 10 места во светот по фрлање храна, во услови кога околу 460.000 граѓани живеат под прагот на сиромаштијата и не можат да си обезбедат по три оброци дневно. Процените се дека вкупните вишоци храна кај нас надминуваат 100.000 тони годишно.

Токму овие загрижувачки податоци беа причина оваа организацијата да започне да го развива системот „Сите сити“, преку која се спасува добрата храна, па наместо да се фрла, се пренасочува кон оние на кои им е најпотребна.

До денес, преку оваа мрежа се донирани над 100 тони храна, односно над 400.486 порции. Големи количини на квалитетна храна со возило се превзема од различни бизниси, и се носи во центри за бездомници, народни кујни, и слично. Оваа активност „Сите сити – Ајде Македонија“ ја организира во соработка со повеќе од 20 големи компании од индустријата за храна, меѓу кои и „Виталиа“, „Жито леб“, „Витаминка“, „Кола“, а над 30 партнерски граѓански организации ја доставуваат храната до крајните корисници.

ФИТР: ВМРО-ДПМНЕ се самодемантира, зошто им пречи растот од 3200% поддршка за македонските компании?

Фондот за иновации и технолошки развој повторно остро реагира на изнесените полуинформации и невистини на вчерашниот и денешниот прес на политичката партија ВМРО-ДПМНЕ.

Прво, уште еднаш демантираме дека фирмата „Еленица Струмица“ е директен или било каков друг дел од сопственичка структура на корисник на средствата од Фондот по која било основа. Истото го објавивме и пред три дена.

Второ, политичката партија ВМРО-ДПМНЕ денес излезе со податоци преземени од веб станицата на Фондот, иако токму вчера тврдеше дека Фондот „молчел и криел податоци“. Дополнително, потсетуваме дека компанијата „ПауерАд“, во конкуренција над 10.000 апликации, беше избрана во топ 50 напредни стартап бизниси во светот од страна на Светскиот инвестициски форум кој се одржа во Истанбул, Турција. Тоа меѓународно признание дополнително потврдува дека оваа компанија е еден од стартапите со најголем потенцијал за пораст во 2019 година. Овој податок е исто така во повеќе наврати јавно презентирано преку страниците на Фондот, но не беше споменато на денешната прес конференција.

Трето, од податоците што денес ги презентираше оваа политичка партија се (само)демантираат вчерашните обвинувања за „10,5 милиони евра изнесени од Фондот“. Средствата за ко-финансирање се во износ од 210.000 евра, од кои, досега, според утврдениот квартален систем се исплатени само дел од средствата. Намерно или случајно, се заборава да се спомене и податокот дека компанијата „ПауерАд“ вложува сопствени финансиски средства во износ од 95.000 евра.

Четврто, уште еднаш информираме дека Одлуката за финансирање на компанијата „ПауерАд“ е донесена во декември 2018 година, заедно со уште 60тина други компании. Два месеци предходно (во октомври) побарана и доставена е и Изјава за сопственичка структура. Потсетуваме дека обврската за доставување на Изјавата е воведена во рамки на истиот јавен повик, при што првично беше побарана за 79 компании за кои веќе беше донесена одлука за финансирање во јули 2017г. Изјавата е составен дел од апликацискиот пакет за сите јавни повици оттогаш. Исто така, и во оваа реакција обрнуваме внимание на фактот дека за секоја промена во сопственоста, по доставување на изјавата, а во период од 3 години по завршување на проектот, корисникот на средства има обврска да побара согласност од Фондот.

Петто, информираме дека во тек е ревизија на користењето на средствата од Фондот кај компанијата „ПауерАд“, што е дел од редовниот процес на мониторинг. Истиот го вршат две странски реномирани ревизорски куќи – Дилојт и Грант Торнтон. Зависно од наодите од ревизијата, ќе се донесе одлука за продолжување на финансирањето на проектот. Во овој дел, посебно нагласуваме дека ревизијата на користењето на средства од Фондот е редовна процедура која се врши на квартално ниво за сите компании – корисници на грантови од ФИТР и е основа без која не е можно продолжување на финансирањето на компаниите во следниот квартал.

Шесто, во рамки на проектната апликација и буџет нема предвидени средства за набавка на „луксузни возила“, ниту пак овие трошоци се подобни за финансирање преку некоја од програмите на Фондот.

Последно, Фондот во изминатите 24 месеци обезбеди поддршка од Владата и Светската банка за над 300 домашни компании, со преку 15.000 вработени. Во тие рамки над 100 старт ап компании реализираат свои проекти, а се креираше и посебен Фонд за млади умови, чија цел е нивно задржување во државата. Износот на поддршата за домашните фирми е над 3.200% повисока од периодот до 2017 година.

Горенаведените напори на ФИТР за воведување на иновациската култура во земјава беа исто така меѓународно препознаени и вреднувани. Најновиот извештај на Глобалниот иновациски индекс (ГИИ) за 2019 година покажа дека Република Северна Македонија се наоѓа на 63то место, што во споредба со лани, е скок од 25 места погоре на листата земји кои вложуваат во иновациска инфраструктура.