„Петок за млади @ФИТР“ – „Забрзан курс“ за аплицирање на меѓународен хакатон на НАСА

Предизвици поврзани со вселенски истражувања, како да се аплицира на меѓународен НАСА хакатон и како да се направи интерактивна видео игрица – со овие теми започна новиот серијал настани „Петок за млади @ФИТР“ кој втора година по ред предвидува активности за поттикнување на креативните вештини и иновативноста кај младите.

Над 70 средношколци има можност да ги слушнат деталите за предизвиците поврзани со вселенски истражувања и подобрување на животот на Земјата, начинот на аплицирање како и дел од искуствата на претходни учесници во пресрет на меѓународниот хакатон на НАСА – “NASA Space Apps Challenge“ што ќе се одржи од 18ти до 20ти октомври во Скопје, во организација на Њуменс бизнис акцелератор.

Петок за млади @ФИТР_NASA Space App Challenge 2

Учесниците на NASA Space Apps Challenge 2019 ќе имаат можност да бидат менторирани и оценувани од страна на претставници на вселенските агенции и експерти од корпорации во конкретната област. Трите победнички тима на NASA Space Apps Challenge пак се пласираат за директно учество во натпреварот за стартап компании кој ќе се одржи во рамките на Space Tech Convention 2019, каде што добиваат можност да ги убедат меѓународни инвеститори да ги поддржат нивните идеи. Уште повеќе, тимот кој ќе се пласира на прво место на локацијата во Скопје добива награда – патување во Kennedy Space Center во Флорида и ќе има можност да присуствува на лансирање на ракета.

Патот од идејата за развивање 3D интерактивна игра во која играчот е соочен со географски проблеми, гејмификацијата како начин да се решат предизвиците од хакатонот и менаџирањето на успешен стартап им го претстави Кристијан Трајковски, еден од менаџерите на компанијата Dark-1 – една од стартап компаниите кои добија финансиска поддршка од ФИТР. Трајковски кој исто така учествувал на предизвиците на НАСА споделувајќи го своето искустви посочи дека е најважно игрите да имаат едукативен карактер и ги поттикна младите кои љубопитно го следеа секој негов збор да преземат конкретни иницијативи.

Петок за млади @ФИТР_NASA Space App Challenge 3

„Доколку имате супер идеа и верувате во неа, пробајте. Со помош на постарите направете бизнис план и обидете се. Има институции, како ФИТР кои ќе ви помогнат таа да стане успешна реалност.“, вели Трајковски.

Средношколците, поделени во групи имаа можност и практично да испробаат со какви задачи би се соочиле на НАСА хакатонот. Како што велат, за голем дел од нив ова би било тежок предизвик кој вреди да се проба.

Инаку, иницијативата „Петок за млади @ФИТР“ е дел од активностите на Фондот насочени кон поттикнување на критичкото и креативното размислување, и развој на иновативноста и претприемништвото кај младите. ФИТР неодамна ја презентираше и предлог програмата „Фонд за млади умови“ која треба да ги опфати сите постоечки иницијативи и да креира системско решение со кое државата во иднина ќе вложува во развивање и поддршка на таленти кај младите.

Петок за млади @ФИТР_NASA Space App Challenge 4

Во изминатите 18 месеци ФИТР вложи околу 15 милиони денари во три различни програми наменети за поддршка на младите, во кои учествуваат над 500 основци и средношколци, додека 54 основни и средни училишта реализират проекти за истражување.

ФИТР достави до Владата иницијатива за поедноставување на пристапот на компаниите до финансиска поддршка, преку измени на Правилникот за инструментот за поддршка – кофинансирани грантови за технолошки развој

Измените се состојат од воведување на скратена (fast track) постапка за аплицирање за компании што веќе учествувале на јавни повици на Фондот, а кои ги поминале фазите на административна проверка и претселекција. Конкретно, секоја компанија што добила соодветни забелешки и препораки од Комитетот за одобрување на инвестиции на Фондот во последна фаза ќе може да достави ист односно подобрен проект на следен јавен повик користејќи ја скратената процедура. Ова право се однесува за сите јавни повици на Фондот објавени во период од 12 месеци од добиеното известување на компанијата од Комитетот на претходен јавен повик.

Со скратената постапка се намалуваат трошоците за компаниите, но и на Фондот и значително се намалува времето од аплицирање до одлука на Комитетот за одобрување на инвестиции. Во практика, од досега потребните 60 – 90 денови (зависно од број на пристигнати апликации) постапката за компаниите што ре-аплицираат со ист или подобрен проект би траела двојно помалку.

Со измените предвидено е компаниите што аплицираат да достават и задолжителен План за транспарентност и комуникација со јавноста, со што дополнително ќе се зајакне видливоста на инвестицијата, но и резултатите од проектите.

Согласно предложените измени во Среднорочната програма за работа на Фондот, нови јавни повици по новиот правилник, во скратена и редовна постапка (за нова апликанти) се очекуваат веднаш по неговото усвојување од Владата.
Предложените измени ќе се пресликаат и во останатите инструменти на Фондот, ко-финансирани од Владата и Светската банка.

Наместо умови да извезуваме успешни приказни – Прв академски час на ФИНКИ

Знаењето е единственото богатство кое никој не може да ви го земе – со оваа порака на деканот Иван Чорбев го започна првиот академски час за учебната 2019/2020 година за 1062 бруцоши на Факултет за информатички науки и компјутерско инженерство (ФИНКИ) при Универзитет „Св. Кирил и Методиј“ во Скопје.

Директорот на Фондот за иновации и технолошки развој (ФИТР), Јован Деспотовски посочи дека до сега повеќе од 100 стартап компании користат средства од Фондот, развиваат свои бизниси и вработуваат млади луѓе. Во скора иднина, рече тој, бројот на вакви успешни примери на брзорастечки бизниси поддржани од ФИТР ќе биде уште поголем.

ФИНКИ прв академски час во учебна 2019/2010 година 2

„Верувајте, еднакво сум возбуден како студентите кои се тука присутни. Наша цел е заедно да ги смениме стереотипите дека секој оној кој е млад, добро образован и паметен треба да си замине од земјава за да успее. Прашањето за одлив на мозоци е легитимно, но ве охрабрувам да размислувате во насока на тоа што може државата да направи за вас и вашата иднина овде. За таа цел, ФИТР креира програми за младите луѓе кои сакаат своите бизнис идеи да ги развијат дома.“, истакна Деспотовски.

Директорот на ФИТР ги увери младите дека Фондот за иновации и технолошки развој и понатаму ќе вложува во ваквиот свет на млади, иновативни и талентирани умови!

„Искористете го знаењето што ќе го стекнете на факултет. Техничките науки се иднината на светот, а вие сте направиле вистински чекор, затоа што технологијата го движи светот.“, рече Деспотовски во своето обраќање пред новозапишаните студенти на ФИНКИ.

ФИНКИ прв академски час во учебна 2019/2010 година 3

На настанот, свое обраќање имаа и директоркaта на МАСИТ, Анита Никова, креаторот на апликацијата „Мој воздух“, Горјан Јовановски, како и д-р Томе Ефтимов – најдобар млад научник од нашата земја за 2018 година.

Меѓународен оглас за избор на двајца членови на Комитетот за одобрување на инвестиции

Фондот за иновации и технолошки развој (ФИТР) распиша меѓународен оглас за избор на двајца членови на Комитетот за одобрување на инвестиции. Огласот претставува редовна и транспарентна постапка која се прави поради истекот на двогодишниот мандат на двајца од вкупно пет членови на Комитетот, Глигор Ташковиќ и Авинаш Сахи.

Комитетот за одобрување на инвестиции го сочинуваат 5 членови, кои се избрани и именувани од страна на Владата на Република Северна Македонија. Комитетот ги разгледува и ги одобрува предлог-проектите доставени до него за сите инструменти за поддршка на Фондот. Членовите на Комитетот се избираат од редот на експерти со најмалку десетгодишно меѓународно искуство во областа на инвестициите во иновациската дејност.

Линк до огласот: https://jobs.economist.com/job/22084/committee-members/

Повеќе информации за организациската поставеност на Фондот, составот и надлежностите на Комитетот се достапни на следниот линк: http://www.fitr.mk/portfolio-item/%D0%BD%D0%B0%D1%88%D0%B0%D1%82%D0%B0-%D0%BE%D1%80%D0%B3%D0%B0%D0%BD%D0%B8%D0%B7%D0%B0%D1%86%D0%B8%D1%98%D0%B0/

ФИТР: ВМРО-ДПМНЕ се самодемантира, зошто им пречи растот од 3200% поддршка за македонските компании?

Фондот за иновации и технолошки развој повторно остро реагира на изнесените полуинформации и невистини на вчерашниот и денешниот прес на политичката партија ВМРО-ДПМНЕ.

Прво, уште еднаш демантираме дека фирмата „Еленица Струмица“ е директен или било каков друг дел од сопственичка структура на корисник на средствата од Фондот по која било основа. Истото го објавивме и пред три дена.

Второ, политичката партија ВМРО-ДПМНЕ денес излезе со податоци преземени од веб станицата на Фондот, иако токму вчера тврдеше дека Фондот „молчел и криел податоци“. Дополнително, потсетуваме дека компанијата „ПауерАд“, во конкуренција над 10.000 апликации, беше избрана во топ 50 напредни стартап бизниси во светот од страна на Светскиот инвестициски форум кој се одржа во Истанбул, Турција. Тоа меѓународно признание дополнително потврдува дека оваа компанија е еден од стартапите со најголем потенцијал за пораст во 2019 година. Овој податок е исто така во повеќе наврати јавно презентирано преку страниците на Фондот, но не беше споменато на денешната прес конференција.

Трето, од податоците што денес ги презентираше оваа политичка партија се (само)демантираат вчерашните обвинувања за „10,5 милиони евра изнесени од Фондот“. Средствата за ко-финансирање се во износ од 210.000 евра, од кои, досега, според утврдениот квартален систем се исплатени само дел од средствата. Намерно или случајно, се заборава да се спомене и податокот дека компанијата „ПауерАд“ вложува сопствени финансиски средства во износ од 95.000 евра.

Четврто, уште еднаш информираме дека Одлуката за финансирање на компанијата „ПауерАд“ е донесена во декември 2018 година, заедно со уште 60тина други компании. Два месеци предходно (во октомври) побарана и доставена е и Изјава за сопственичка структура. Потсетуваме дека обврската за доставување на Изјавата е воведена во рамки на истиот јавен повик, при што првично беше побарана за 79 компании за кои веќе беше донесена одлука за финансирање во јули 2017г. Изјавата е составен дел од апликацискиот пакет за сите јавни повици оттогаш. Исто така, и во оваа реакција обрнуваме внимание на фактот дека за секоја промена во сопственоста, по доставување на изјавата, а во период од 3 години по завршување на проектот, корисникот на средства има обврска да побара согласност од Фондот.

Петто, информираме дека во тек е ревизија на користењето на средствата од Фондот кај компанијата „ПауерАд“, што е дел од редовниот процес на мониторинг. Истиот го вршат две странски реномирани ревизорски куќи – Дилојт и Грант Торнтон. Зависно од наодите од ревизијата, ќе се донесе одлука за продолжување на финансирањето на проектот. Во овој дел, посебно нагласуваме дека ревизијата на користењето на средства од Фондот е редовна процедура која се врши на квартално ниво за сите компании – корисници на грантови од ФИТР и е основа без која не е можно продолжување на финансирањето на компаниите во следниот квартал.

Шесто, во рамки на проектната апликација и буџет нема предвидени средства за набавка на „луксузни возила“, ниту пак овие трошоци се подобни за финансирање преку некоја од програмите на Фондот.

Последно, Фондот во изминатите 24 месеци обезбеди поддршка од Владата и Светската банка за над 300 домашни компании, со преку 15.000 вработени. Во тие рамки над 100 старт ап компании реализираат свои проекти, а се креираше и посебен Фонд за млади умови, чија цел е нивно задржување во државата. Износот на поддршата за домашните фирми е над 3.200% повисока од периодот до 2017 година.

Горенаведените напори на ФИТР за воведување на иновациската култура во земјава беа исто така меѓународно препознаени и вреднувани. Најновиот извештај на Глобалниот иновациски индекс (ГИИ) за 2019 година покажа дека Република Северна Македонија се наоѓа на 63то место, што во споредба со лани, е скок од 25 места погоре на листата земји кои вложуваат во иновациска инфраструктура.

Ги охрабруваме младите и ги подржуваме нивните иновативни и креативни идеи – ФИТР со поддршка за „ИноваМак 2019“

Фондот за иновации и технолошки развој (ФИТР) по втор пат го поддржа престижен меѓународен настан – Меѓународен саем на пронајдоци, иновации и нови технологии „ИноваМак 2019“. Организатор на саемот е Националната асоцијација на пронаоѓачите на Македонија (NAIM), а покровител е Светската федерација на иноваторски асоцијации (IFIA).

Традиционално, Државниот завод за индустриска сопственост (ДЗИС), за време на одржувањето на Саемот доделува три парични награди во категоријата на пријавен или заштитен патент и дизајн, жена иноватор и млад иноватор. Целта на доделувањето на наградите е да се поддржат пронаоѓачите во нивната креација и нивното мотивирање во создавањето на пронајдоците кои ќе бидат успешно реализирани на пазарот.

Иновамак 2019 со поддршка на ФИТР 2

„Со поттикнување на иновативноста и талентите во нашата држава, директно придонесуваме за развојот на општеството, напредокот и економскиот развој. Истовремено создаваме услови за младите да ги резлизираат своите амбиции тука во нашата земја. Токму затоа, ваквите манифестации се многу важни и ќе продолжиме силно да ги поддржуваме.“, истакна Горан Герасимовски, заменик директор на ДЗИС.

Претставвиците на Фондот ги поттикнаа учесниците на настанот да ги искомерцијализираат своите иновативни идеи, односно да аплицираат на некој од инструментиите на Фондот.

„Фокусот на ФИТР е ставен особено на младата популација, затоа креираме програми и јавни повици со кои ги охрабруваме младите и подржуваме нивните иновативни и креативни идеи. Токму од нив почнува концептот за креативност и иновација што еден ден прераснува во бизис и претприемништво“, истакна Неда Икономова Гавриловска во името на ФИТР.

Иновамак 2019 со поддршка на ФИТР 3

Над стотина иноватори од повеќе од 20 држави ги изложуваат своите креативни и иновативни идеи на третиот Меѓународен саем на пронајдоци, иновации и нови технологии „Иновамак 2019“ што се одржа во Скопје од 24 до 26 септември.

Шест милиони денари за иновации на најдобрите основци и средношколци

Во владата на Република Северна Македонија денеска се одржа настан по повод потпишување на договорите за 34 проекти на основни и средни училишта, кои беа наградени во рамките на Програмата „Предизвик за млади истражувачи 2“, на ФИТР и на МОН.

На церемонијата се презентираа двата победнички проекти од учениците од првонаграденото основното училиште „Даме Груев“ од Битола и првонаграденото средно училиште „Ванчо Прке“ од Виница.

На церемонијата се обрати премиерот на владата на Република Северна Македонија, Зоран Заев. Тој истакна дека владата е посветена на поддршката на младите истражувачи, со цел да се остварат нивните идеи и да се реализираат нивните креативни решенија за секојдневните проблеми и прашања со кои се соочуваме сите.

„Градејќи се себеси како лидери и остварувајќи ги своите соништа тука, дома, младите луѓе ја градат и економската иднина на нашата земја, Северна Македонија. Нам ни се потребни млади истражувачи и Ви благодарам почитувани професори и ментори што го препознавате и развивате нивниот креативен потенцијал“, додаде Заев.

Со вкупен фонд од 6 милиони денари и дополнителни 30.000 денари за менторите на учениците кои се дел од овој проект оваа година се стимулира креативноста и се отвора нова димензија и за основците и за средношколците.

IMG_3779

Директорот на Фондот за иновации и технолошки развој, Јован Деспотовски при церемонијата истакна дека ФИТР веќе втора година реализира Предизвик за млади истражувачи. „Со над 10 милиони денари поддржуваме проекти на 54 основни и средни училишта од цела земја во кои над 300 ученици и 130 ментори работат на истражувачки проекти од различни области. Секој којшто ги гледа овие млади деца со право може да каже сериозна држава каква што сакаме да бидеме и настојуваме да станеме мора да обезбеди поддршка за нив“, додаде Деспотовски.

Иновативен производ за гаснење пожари, развиен од компанија корисник на грант од ФИТР

Заменикот на претседателот на Владата задолжен за економски прашања д-р Кочо Анѓушев и директорот на Фондот за иновации и технолошки развој Јован Деспотовски, присуствуваа на презентација на производот на компанијата ВТ Продакшн од Скопје, добитник на ко-финансиран грант од Фондот, која се одржа на полигонот за вежби на Бригадата за против пожарна заштита на град Скопје.

Компанијата ВТ Продакшн со вкупни средства од околу 100 илјади евра, од кои 2/3 се грант од ФИТР, разви адитив-ретардер, за вода за гасење и заштита од пожар, кој го нарекоа Fireless, чија функционалност беше презентирана преку три показни вежби.

IMG_3500

Вицепремиерот Анѓушев, по презентацијата на производот, искажа задоволство што е развиен производ каков досега нема во регионот, а кој може да има голема примена при заштита и гасење на пожари, со што се докажува дека финансиските средства од Фондот наменети за комерцијализација на иновации се правилно наменети.

„Се надеваме овој адитив да стане комерцијален производ и дека компанијата ќе најде соодветен пазар каде ќе го пласира производот, што е и целта на програмата за поддршка на малие и средни компании на ФИТР; да се развијат производи и истите понатаму да се комерцијализираат, со што компаниите ќе растат“, рече вицепремиерот.

IMG_3288

Анѓушев посочи дека во 2018 година потпишани се договори со 133 компании, чии инвестиции се очекува да достигнат 28 милиони евра, од кои над 16 милиони поддршка од државата.

„Сите проекти на овие компании се во фаза на реализација, а веќе 8,2 милиони евра се исплатени на компаниите кон компаниите. На јавниот повик во 2019 година имаме навистина висок интерес, доставени се над 500 апликации, а буџетот е проектиран на 10 милиони евра од кои 2 милиони се од Светска Банка, која ја препозна важноста на програмата. Со ребалансот на буџетот планираме и дополнителни средства за Програмата за поддршка на мали и средни претпријатија, согледувајќи го големиот интерес од компаниите“, нагласи вицепремиерот Анѓушев.

Директорот на Фондот за иновации и технолошки развој Јован Деспотовски, посочи дека компанијата ВТ Продакшн е добар пример на мала домашна компанија, која разви уникатен производ во соработка со академската заедница, кој може да најде практична примена и да помогне во надминување на еден актуелен предизвик, односно пожарите кои се појавуваат.

IMG_7546

„Ова е производ кој може да најде примена и во Северна Македонија, но и во регионот и секаде во светот. Овој проект е дел од дваесетината проекти за заштита на животната средина, кои се со вкупна вредност од околу 200 милиони денари, дел од средствата се обезбедени од Фондот, а дел од самите компании. Очекуваме вакви видливи и конкретни резултати од сите компании, за да може граѓаните и општеството да ги почуствуваат резултатите од проектите“, потенцираше директорот Деспотовски.

Управителот на ВТ Продакшн Влатко Тасевски изјави дека компанијата ќе донира од 10-15 илјади литри од адитивот на надлежните институции, кои се во вредност од 6-10 илјади евра, за да се утврди неговата функционалност и примена во теренски услови. Тој дополни дека со средствата од Фондот, се забрзала имплементацијата на проектот, кој почнал да се развива во март 2019 година и само за шест месеци е влезен во пред комерцијална фаза.

IMG_7587