Posts

Вицепремиерката Царовска и Владиниот економски тим на средба со Советот на странски инвеститори

Заменичката на Претседателот на Владата задолжена за економски прашања, Мила Царовска, заедно со министрите за странски инвестиции Зорица Апостолска, д-р Елвин Хасан и д-р Бардуљ Даути, директорите на дирекцијата за технолошко индустриски развојни зони Александар Младеновски, на Агенцијата за странски инвестиции и промоција на извозот Арбен Вила, на Фондот за иновации и технолошки развој, Јован Деспотовски, претставници од Министерството за финансии, Управата за јавни приходи, Царинската управа и други органи на државната управа, остварија средба со претставници на компании-членки на Советот на странски инвеститори при Стопанската комора на Македонија.

Вицепремиерката Царовска посочи дека на оваа средба ќе биде презентирана анализа на реализирани барања и предлози од „Белата книга 2018“ на Советот на странски инвеститори, а воедно ќе се дискутира со претставниците на странските компании за предизвиците со кои се соочуваат во секојдневното работење и за решенија како тие предизвици да се надминат.

„Ние како Влада ги анализиравме сите предлози доставени од Советот на странски инвеститори, направивме пресек и на овој состанок ќе дискутираме што е направено, а што останува како предизвик да се реализира. Сега ја анализиравме „Белата книга“ на Советот, онаа што ја издадоа во 2018 година и сме на добра стартна позиција, бидејќи Владата и другите државни органи веќе имааат реализирано околу 10% од нивните барања, а околу 60% се во процедура. Голем дел од барањата и предлозите се поврзани со законска регулатива што е дел од трудовото законодавство, здравје и безбедност на работа и новиот Закон за работни односи, којшто го создававме заедно со стопанските комори и голем дел од барањата во Белата книга, веќе се имплементирани во новото законско решение. Очекуваме по составот на новата Влада, Законот за работни односи да биде ставен во Парламентот на усвојување“, потенцираше вицепремиерката Царовска.

Претседателот на Советот на странски инвеститори и генерален директор на ЕВН, Штефан Петер, посочи дека состанокот со вицепремиерката и владиниот тим се одржува во вистинско време и дава импулс дека и покрај тоа што се наоѓаме во предизборен период, стопанството треба да продолжи да работи и да се развива со предвидената динамика.

„Овој состанок е мошне важен за Советот на странски инвеститори и доаѓа во вистинско време, зашто сите го почитуваме Пржинскиот договор и Парламентот ќе почне со пауза, но глобалната економија, економијата во Северна Македонија не се на пауза и бизнис секторот не запира. Затоа сум благодарен што на оваа средба може да дискутираме за економските реформи што се неопходни, а што се прикажани во нашата Бела книга од 2018. Ги повикувам сите мои колеги, претставници на домашни и странски компании, да не чекаат со носењето одлуки, да не чекаат да завршат изборите, туку да дејствуваат сега. Бизнисот мора да функционира и да се развива“, потенцираше Петер.

Одговорајќи на новинарско прашање, претседателот на Советот на странски инвеститори рече дека два главни предизвици кои стојат пред Владата и компаниите во наредниот период се царинските давачки и миграцијата на работната сила во други земји. Надминувањето на овие два предизвици се можни само доколку постои тесна соработка помеѓу Владата, државните органи и бизнисот, заклучи Петер.

Вицепремиерката Царовска посочи дека активно се работи на мерки со кои ќе се зголемува вработливоста на невработените лица во Северна Македонија, со цел на усогласување на побарувачката и понудата на пазарот на трудот и натамошно намалување на стапката на невработеност, но и повисока продуктивност и конкурентност на компаниите од земјата.

„Токму затоа и претходно како Министер за труд и социјална политика и сега како Вицепремиерка за економски прашања, работам на усогласување на понудата и побарувачката на пазарот на труд и тоа се гледа преку инвестициите во оперативните мерки за вработувања коишто се ад-хок усогласувања на потребите на пазарот за труд за брзо преквалификување и доквалификување на работната сила, но исто така работиме и со Министерството за обраование и наука и нашите меѓународни партнери и бизнис секторот за воспоставување на системско решение за образование во техничките и стручните училишта усогласено со современите потреби на бизнис секторот“, потенцираше вицепремиерката за економски прашања

Царовска и Деспотовски во посета на ИТ компанијата Докстим – Преку ФИТР поддржани 314 мали и средни компании, се реализираат проекти во вредност од 57 милиони евра

Заменичката на Претседателот на Владата задолжена за економски прашања Мила Царовска, заедно со директорот на Фондот за иновации и технолошки развој Јован Деспотовски, ја посетија иновативната ИТ компанија Докстим, којашто е корисник на инструментот за кофинансирани грантови за иновации.

Вицепремиерката Царовска посочи дека во изминатите две и пол години Фондот за иновации и технолошки развој значително го зголемил опфатот на компаниите коишто се поддржани. Ако во 2017 година во портфолиото на фондот биле само триесетина компании со вкупна поддршка од околу 1 милион евра, во моментов се поддржани 314 микро, мали и средни компании, а вкупните проекти се со вредност од 57 милиони евра, што значи дека поддршката од ФИТР кон компаниите е зголемена за над 50 пати, посочи Царовска.

ЗПВРСМ Царовска и ДФИТР Деспотовски во посета на Докстим и Микротика 2

„Преку мерките од Планот за економски раст, кој се спроведуваат преку Фондот за иновации и технолошки развој, поддржани се 314 компании кои реализираат проекти во вкупна вредност од околу 57 милиони евра, од кои 34 милиони евра се поддршка преку Фондот, односно од буџетските средства. Важно е дека се поддржуваат компании на целата територија, односно во повеќе општини и во различни сектори. Застапени се компании од ИТ индустријата, но и од земјоделството, производство и преработувачка на храна, автомобилска индустрија, градежништвото и многу други сектори. Микро, малите и средни компании се двигател на економскиот раст и преку вакви фондови државата треба да продолжи да го поддржува нивниот развој“, потенцираше вицепремиерката Царовска.

Директорот на ФИТР, Деспотовски се осврна на проектот на компанијата Докстим, една од многуте ИТ компании кои се развиваат со поддршка од Фондот.

„Докстим е само една компанија, пример кој потврдува дека вложувањето и поддршката на домашните компании, преку инструментите на Фондот создава успешни приказни и проекти.

Компанијата Докстим веќе успешно работи и на странските пазари, и e една од нашите амбасадори во кампањата „Создаваме успешни приказни“ преку која ги презентираме резултатите од работата на ФИТР. Токму преку овие примери, покажавме дека со вложување во домашните компании во изминативе две години успеавме да ја зацврстиме домашната економија, како што гледате овде – да ги задржиме младите, и наместо да извезуваме луѓе да извезуваме успешни бизнис приказни. Исто така успевме и да ја вратиме довербата во системот. Доказ за тоа се бројките. Еве само на последните два повика кои се во тек имаме голем интерес. До сега само за инструментот за технолошки развој се преземени 480 апликациски пакети, додека за стартап и спиноф компании веќе се преземени 313 апликациски пакети. Ова е повеќе од мотив да продолжиме и понатаму со вакви мерки кои даваат реални резултати“, нагласи Деспотовски.

ЗПВРСМ Царовска и ДФИТР Деспотовски во посета на Докстим и Микротика 3

ФИТР: 22 проекти од млади претприемачи со потенцијал за брз пораст добија финансиска поддршка преку Програмата за самовработување

Дваесетидва проекти од млади претприемачи со потенцијал за брз пораст веќе започнаа со реализација преку Програмата за самовработување за 2019г, што ја реализира Агенцијата за вработување, во соработка со УНДП и Фондот за иновации и технолошки развој.

Овие проекти се дел од новата ИН-група што е воведена како новина во Програмата, чија цел е проектите со иновативна компонента да добијат соодветна менторска поддршка и да го искористат целосниот потенцијал за брз пораст и висока додадена вредност. ИН-групата е надополнување на веќе постојните програми на Фондот за поддршка на старт-ап бизнис, и тоа во рана фаза на формирање на компанија и развој на бизнис план, што досега беше посочувано како крупна пречка за младите луѓе за аплицирање.

На денешниот настан своите проекти ги презентираа двајца млади претприемачи. Зборувајќи како дошла до својата идеја, Ирена Лозана, креаторот на проектот за хигиенските влошки за повеќекратна употреба, истакна дека таа веќе работи според моделот на социјално претприемништво, според кој планира 7% од заработката на нејзините производи да ги донира во загрозени семејства и лица.
IMG_0252„Потребно е да се зголеми свеста кај секоја жена, не само кај жените од руралните региони кои се можеби најголемата група нови корисници на хигиенски влошки за повеќекратна употреба. Влошките се сериозен дел од глобалното загадување, а со овие иновативни производи, веруваме дека секоја жена ќе даде свој придонес во намалувањето на овој проблем. Покрај финансиски средства, потребна ни е помош во делот на маркетинг, промоција и продожба, и верувам дека ќе го добиеме тоа од Фондот“, истакна Лозана.

На настанот се обрати министерката за труд и социјална политика, Мила Царовска, која истакна дека овој механизам претставува вистински чекор напред во поглед на остварување на правото на самовработување и искажа голема благодарност за успешна соработка помеѓу ресорното министерство, УНДП, Агенцијата за вработување и ФИТР.
IMG_0318„Како дел од МТСП мора да ја истакнам одличната соработка со ФИТР и нивната брилијантана идеја стартапите да станат одржливи преку Опративниот план. Мерките од ОП ги прилагодуваме според потребите на компаниите и пазарот на труд. Лани годината ја започнавме со 1,1 милијарди денари наменети за ОП а ја завршивме со 1,3 милијарди денари, што е за три пати повеќе од 2016 година. Идната година ја стартуваме со оваа сума со можност истата да се зголемува во согласност со интересот и реализацијата,“ посочи Царовска.

Директорот на ФИТР Јован Деспотовски им честита на храброста на присутните млади претприемачи за донесената одлука да започнат свој бизнис.

IMG_0327„Државата, институциите вложуваат, даваат поддршка за младите во Република Северна Македонија. Поддршка за развој на сопствена идеја, бизнис, што ќе креира брз раст и додадена вредност за целото општество. Овие 22 нови компании ќе се придружат на над 100 старт-апи кои веќе реализираат свои проекти во рамки на програмите на Фондот во изминатите 24 месеци. Ќе добијат целосна менторска поддршка од наша страна. Очекувам овој број значително да се зголеми и со новиот повик, што Фондот ќе го објави до крајот на годината, а ќе биде повторно наменет, пред се, за младите луѓе во нашата земја“.

Директорката на Агенцијата за вработување, Билјана Јовановска посочи дека до сега годинава постои огромен интерес за програмата за Самовработување, а радува и фактот што дел од тие апликанти размислуваат во насока на воведување иновации.
IMG_0278„Со програмата за Самовработување, оваа година беа поддржани повеќе од 1400 лица кои основаа сопствени бизниси, од кои 430 беа млади лица на возраст до 29 години. Во рамките на оваа програма, беше издвоена посебна група на апликанти, т.н. ИН група, кај кои се препозна потенцијал за основање иновативни, односно брзорастечки бизниси. Фондот за иновации и технолошки развој обезбеди ментори/советници кои им помогнаа на овие апликанти да изработат бизнис планови кои понатаму беа избрани за корисници на програмата. Притоа, беа основани 22 нови бизниси, кои понатаму имаат можност да добијат поддршка и преку јавните повици на ФИТР.“

Нарине Сахакиан, постојана претставничка на програмата за развој на Обединети Нации, ја истакна важната улога на оваа мерка за целокупното македонско општество, и ја потврди заложбата на нејзината организација во иднина посветено да работи, заедно со владините тела, на креирање нови работни места и пилотирање нови иновативни пристапи со цел изнаоѓање конктретни и ефикасни решенија.
IMG_0293„Програмата за развој на Обединетите нации, заедно со националните партнери, преку програмата Самовработување ги поддржуваат претприемачите започнувајќи од нивните бизнис идеи, до формирањето на бизнисот, па се до понатамошната поддршка за бизнис развој и проширување на нивните сервиси и услуги. Ние, во УНДП, сме посебно горди на компаниите формирани преку програмата за Самовработување, а посебно внимание обрнуваме на иновативните бизнис идеи бидејќи сметаме дека се моторот на промени и двигателот до економскиот прогрес кој ќе влијае на корисниците, но и на економијата во целина. Навистина, овие иновативните бизниси се клучен партнер во обезбедување на одржлив развој во земјата“.

Преку Оперативниот план за 2019 година апликантите можат да добијат до 5.000 евра, или ако се двајца содржници до 10.000 евра. За програмата за самовработување, Владата одвои рекордни скоро 8 милиони евра како поддршка на значително висок број претприемачи од првично предвидените средства. На ниво на цела држава за годинава предвидено е потпишување на вкупно 1.484 договори за самовработување. Од нив вкупно 557 лица, односно 38% се млади лица, до 29 години, а 518, односно 35% се жени. Во последните неколку години околу 15 % од вкупно регистрираните приватни бизниси во државата потпаѓаат под програмата самовработување.

Проектот „Local Business Ranker“ поддржан од ФИТР

Домашната компанија „Интерактив Гејминг“ работи на спроведувањето на Проектот наречен Local Business Ranker, кој има за цел развивање алгоритам со помош на кој ќе може да ги рангираат локалните компании.

„Нашето решение треба да даде одговор на прашања од типот кои се најдобри дизајнери на ентериер во Лондон, или пак кои се најдобри електричари во Ливерпул. За таа цел, корисниците на нашето решение добиваат неколку значајни придобивки: Прво, нашиот алгоритам ги елиминира сите нелиценцирани оператори. Понатаму, се намалува времето за наоѓање на соодветна компанија, a исто така значително се намалува и ризикот од лошо извршена услуга, бидејќи во нашиот систем ги листаме само најдобрите компании“.

Во однос на соработката со Фондот за иновации и технолошки развој, тие велат дека е на одлично ниво, a добиените финансиски средства се од големо значење за развојот на нивната компанија, особено за самиот проект.

Компанијата „Интерактив гејминг“ е една од над 130 домашни компании/конзорциуми поддржани од ФИТР во рамките на првиот јавен повик од Планот за економски раст (ПЕР) на Владата на Република Северна Македонија

Само со првиот и вториот инвестициски бран се реализираат инвестиции во домашниот приватен сектор во износ од 28 милиони евра. Се ангажираат над 780 лица, од кои 158 се нови работни места, со просечна плата од 45.000 денари.

ФИТР: Со измените во Среднорочната програма нови можности за македонските компании

Фондот за иновации и технолошки развој отвора нови можности и скратени процедури за македонските компании со измените на Среднорочната програма кои беа усвоени од Владата. Со овие промени, до крајот на годината предвидени се два нови повици – едниот наменет за технолошки развој и вториот за поддршка на стартап компании.

Со ребаланост на буџетот обезбедени се и зголемен обем на средства, односно околу 6 милиони евра за технолошки развој и дополнителни 1,5 милиони за стартап компании. Дополнително, заради рекордниот интерес на компаниите за повикот за комерцијализација на иновации (487 аплицирани инвестициски проекти), со измените во програмата се предвидува проширување на буџетот на повикот.

Со проширениот буџет, што сега изнесува 12,5 милиони евра, се очекува, само за овој повик, да се обезбеди ко-финансирање на проекти на 70 – 75 домашни компании. Вкупно, со овој и новите повици што ќе се реализираат до крајот на 2019 година се очекува околу 200 македонски компании да искористат финансиска поддршка преку третиот столб од Планот за економски раст на Владата, што го реализира Фондот.

Со програмата и новиот повик за технолошки развој, предвидено е воведување и на т.н. скратена процедура за аплицирање, што ќе важи за оние компании кои претходно аплицирале на повиците на Фондот и поминале две од предвидените три фази на проверка и евалуација. Целта е намалување на трошоците за компаниите, но и на Фондот и значително намалување на времето од аплицирање до одлука на Комитетот за одобрување на инвестиции.

Во моментов Фондот има над 240 компании корисници, со вкупно ниво на инвестиции од околу 40 милиони евра во домашниот приватен сектор, од кои над 17 милиони евра се сопствени средства на компаниите. Според првичните анализи на Фондот, направени на група од 52 компании корисници на средства, се бележи раст на просечните приходи на годишно ниво од 50%, раст на бројот на вработените за 27% и раст на платите за околу 40% во просек, во однос на периодот пред започнување со инвестицискиот проект.

Со измените во Среднорочната програма за работа предвидени се повеќе активности во делот на истражување и развој (воведување на нови инструменти за поддршка), продолжување со реализација на проектот за изградба на Научно – технолошки парк во Скопје, како и заокружување на концептот на Фонд за млади умови.Во голем дел од предвидените активности Фондот има меѓународни финансиски партнери, како Светската Банка, ЕУ Делегацијата, Велика Британија, Швајрација, САД и други.

Иновативен производ за гаснење пожари, развиен од компанија корисник на грант од ФИТР

Заменикот на претседателот на Владата задолжен за економски прашања д-р Кочо Анѓушев и директорот на Фондот за иновации и технолошки развој Јован Деспотовски, присуствуваа на презентација на производот на компанијата ВТ Продакшн од Скопје, добитник на ко-финансиран грант од Фондот, која се одржа на полигонот за вежби на Бригадата за против пожарна заштита на град Скопје.

Компанијата ВТ Продакшн со вкупни средства од околу 100 илјади евра, од кои 2/3 се грант од ФИТР, разви адитив-ретардер, за вода за гасење и заштита од пожар, кој го нарекоа Fireless, чија функционалност беше презентирана преку три показни вежби.

IMG_3500

Вицепремиерот Анѓушев, по презентацијата на производот, искажа задоволство што е развиен производ каков досега нема во регионот, а кој може да има голема примена при заштита и гасење на пожари, со што се докажува дека финансиските средства од Фондот наменети за комерцијализација на иновации се правилно наменети.

„Се надеваме овој адитив да стане комерцијален производ и дека компанијата ќе најде соодветен пазар каде ќе го пласира производот, што е и целта на програмата за поддршка на малие и средни компании на ФИТР; да се развијат производи и истите понатаму да се комерцијализираат, со што компаниите ќе растат“, рече вицепремиерот.

IMG_3288

Анѓушев посочи дека во 2018 година потпишани се договори со 133 компании, чии инвестиции се очекува да достигнат 28 милиони евра, од кои над 16 милиони поддршка од државата.

„Сите проекти на овие компании се во фаза на реализација, а веќе 8,2 милиони евра се исплатени на компаниите кон компаниите. На јавниот повик во 2019 година имаме навистина висок интерес, доставени се над 500 апликации, а буџетот е проектиран на 10 милиони евра од кои 2 милиони се од Светска Банка, која ја препозна важноста на програмата. Со ребалансот на буџетот планираме и дополнителни средства за Програмата за поддршка на мали и средни претпријатија, согледувајќи го големиот интерес од компаниите“, нагласи вицепремиерот Анѓушев.

Директорот на Фондот за иновации и технолошки развој Јован Деспотовски, посочи дека компанијата ВТ Продакшн е добар пример на мала домашна компанија, која разви уникатен производ во соработка со академската заедница, кој може да најде практична примена и да помогне во надминување на еден актуелен предизвик, односно пожарите кои се појавуваат.

IMG_7546

„Ова е производ кој може да најде примена и во Северна Македонија, но и во регионот и секаде во светот. Овој проект е дел од дваесетината проекти за заштита на животната средина, кои се со вкупна вредност од околу 200 милиони денари, дел од средствата се обезбедени од Фондот, а дел од самите компании. Очекуваме вакви видливи и конкретни резултати од сите компании, за да може граѓаните и општеството да ги почуствуваат резултатите од проектите“, потенцираше директорот Деспотовски.

Управителот на ВТ Продакшн Влатко Тасевски изјави дека компанијата ќе донира од 10-15 илјади литри од адитивот на надлежните институции, кои се во вредност од 6-10 илјади евра, за да се утврди неговата функционалност и примена во теренски услови. Тој дополни дека со средствата од Фондот, се забрзала имплементацијата на проектот, кој почнал да се развива во март 2019 година и само за шест месеци е влезен во пред комерцијална фаза.

IMG_7587

Проект на компанијата „Фор Лејди“ со поддршка од ФИТР

Проектот „Биохигенски Алое хулахопки“ на компанијата „Фор Лејди“, која е основана во 1995 година, има за цел да реши два проблеми во домашната индустрија. Прво, да ја заштити животната средина, и вториот проблем е да му се понуди на крајниот потрошувач козметички ефект и дерматолошка заштита при негова употреба.

„Во нашата индустрија сите хулахопки и чорапи што денеска сите ги користиме се направени од пластика, и во просек им требаат 50 години да се разградат. Текстилната индустрија е еден од најголемите загадувачи на планетата. Истражувањата направени на оваа тема покажуваат дека скоро 5% од отпадот во депониите е резултат на текстилната индустрија.“, вели Сања Лазаревска од компанијата „Фор Лејди“.

Таа посочува дека производот кој го развиваат со средства од Фондот за иновации и технолошки развој ќе се разградува за 5 години и ќе има за цел да даде козметички бенефит на крајниот корисник. По успешното завршување на овој проект оваа компанија има за цел да го исполни својот производствен капацитет и да го користиме сто посто, како и да ја развие еко свеста кај самите вработени и кај потрошувачите, со што дополнително покрај производство на зелен производ ќе користи и зелена технологија за своето производство и за дистрибуција до крајниот корисник.

„Исто така, нашата компанија си постави за цел на новите работни места кои ќе се отворат како резултат на проширување на нашиот бизнис со овој проект да вработува самохрани мајки како и млади работници до 29 години.“, истакнува претставничката на компанијата во видеото.

Компанијата Фор Лејди е една од над 130 домашни компании/конзорциуми поддржани од ФИТР во рамките на првиот јавен повик од Планот за економски раст на Влада на Република Северна Македонија

Со првиот и вториот инвестициски бран се реализираат инвестиции во домашниот приватен сектор во износ од 28 милиони евра. Се ангажираат над 780 лица, од кои 158 се нови работни места, со просечна плата од 45.000 денари.

Започна фазата на финална селекција во која влегуваат 368 домашни компании

Вкупно 368 домашни компании продолжуваат во процесот на финална селекција на Јавниот повик за комерцијализација на иновации на ФИТР. Проектите на овие компании, кои ја поминаа фазата на претселекција, сега ги разгледува Комитетот за одобрување на инвестиции – независно тело составено од тим од пет странски експерти кое ќе ја донесе финалната одлука на кои предлог проекти ќе им биде одобрена финансиска поддршка.

Од овие 368 компании, 162 се микро, 181 мали, а 25 средни. Повеќе од половината од компаниите се регистрирани во главниот град, додека останатите се распоредени низ 30 општини од целата земја, меѓу кои и Гостивар, Охрид, Куманово, Свети Николе, Делчево, Ново Село, Валандово, Крива Паланка и Вевчани. Најголем дел од нив се од ИТ индустријата, по што следат технолошкиот и здравствениот сектор, текстилната/кожна индустрија, земјоделието, а има и предлог проекти за примена на иновации во машинското инженерство и туризмот.

Вкупниот обем на планирани инвестиции кај овие компании е нешто над 87 милиони евра, од кои 67% или над 58 милиони евра се побарано учество на Фондот, додека 33% или околу 29 милиони евра се сопствени средства кои апликантите планираат да ги вложат во домашната економија. Иницијално предвидениот буџет за овој јавен повик е 5 милиони евра, со што аплицираниот износ се надминува за речиси 12 пати.

Овие рекордни бројки и огромниот интерес на компаниите на јавните повици на ФИТР, претставуваат јасен знак на доверба во процедурите и инструментите на Фондот. Истовремено, ова е уште еден показател дека домашните компании имаат потреба од финансиска поддршка и се подготвени да инвестираат и сопствени средства во развој и иновации.

Инаку во фазата на претселекција влегоа 455 компании, за чија евалуација беа ангажирани 95 надворешни стручни лица во 22 економски дејности. Секоја апликација се разгледува од три стручни лица одделно, а проектите кои добија минимум 51 поен во просек, преминуваат во финалната фаза.

Сите проекти се оценуваат согласно дефинираните критериуми: степен на иновативност, квалитет на подготвен проект, потенцијал на пазарот, капацитет на апликант и влијание на проектот.

Јавниот повик се реализира во рамки на Планот за економски раст на Владата, во чие финансирање од оваа година се вклучи и Светската банка како финансиски партнер.