Posts

Вложувањето во старт ап бизнис идеи е вложување во иднината и во нашиот заеднички напредок и прогрес

Претседателот на Владата на Република Северна Македонија, Зоран Заев, вицепремиерот задолжен за економски прашања, Кочо Анѓушев и директорот на Фондот за иновации и технолошки развој, Јован Деспотовски имаа свои обраќања на настанот за промоција на 48 старт ап проекти – добитници на финансиска поддршка од двата повика на јавниот повик на ФИТР, „Стартапувај“.

„Кога треба да ги поддржиме младите луѓе и нивните иновативни бизнис идеи тогаш задоволството е обострано и е најголемо. Вложувањето во вашите старт ап бизнис идеи е вложување во иднината и во нашиот заеднички напредок и прогрес“ рече премиерот Заев.

Презентација на проекти од Стартапувај во „Јавна соба“, ПВРСМ Зоран Заев

Тој им се обрати на добитниците на грантови од повикот „Стартапувај“ и потенцираше дека младите луѓе се носители на промената што се случува во нашата земја.

„Јас сум уверен дека сите овие 48 проекти ќе бидат успешни и ќе донесат нова додадена вредност во нашата економија и на свој начин ќе го подобрат нашиот заеднички живот. Фондот за иновации и технолошки развој заедно со Светска Банка обезбеди средства во висина од 1.8 милиони евра како финансиска поддршка за овие проекти. Со поддршката на овие старт-апи се отвораат 45 за старт нови работни места, а просечната исплатена плата е во износ од 462 евра“, нагласи премиерот Заев.

Вицепремиерот Анѓушев потенцираше дека денешното време е време на стартап компаниите. Тој тоа го поткрепи со фактот што во светот постојат компании со повеќе децениска традиција, сепак и покрај нивната успешност и традиција, голем дел од највредните компании во денешно време не се постари од 15-20 години, а започнале како стартапи.

„Амазон, Фејсбук, Тесла, Ејпл се компании кои започнале како стартапи, имале брз раст, а денес вредат многу. Друг пример е Mobile Eye, стартап компанија од Израел, кои го иновираа системот за самоуправувачки возила, а е продаден за двоцифрена вредност во милијарди. Владата ги креираше мерките од Планот за економски раст токму во таа насока, за поддршка на компаниите технолошки да се развиваат и да внесуваат иновативни решенија и резултатите покажуваат дека мерките се искреирани правилно. Во 2019 година обезбеден е рекорден износ на средства во буџетот за економските програми на Владата, за 47% повеќе средства во однос на 2018 година, со кои се поддржуваат странските, но во уште поголем број домашните компании“, нагласи Анѓушев.

Презентација на проекти од Стартапувај во „Јавна соба“, ZPVRSM Kocho Angjushev

Директорот на Фондот за иновации и технолошки развој, Јован Деспотовски, кој беше домаќин на настанот, истакна:

„Оваа влада е вистински партнер на младите во земјава. И тоа не со ветувања туку со конкретни мерки кои даваат вистински резултати. ФИТР до сега има вложено околу 2,5 милиони евра во околу стотина стартап компании. Поттикнавме млади луѓе да се охрабрат своите идеи да ги претворат во успешни бизниси. Веќе работиме на креирање нови мерки со кои ќе се олесни основање на компании и пристапот до странски инвеститори. Целта ни е овде да создадеме европски услови и стандарди, со цел да се спречи одливот на мозоци од земјава, и да покажеме дека можеме да извезуваме иновативни продукти и услуги наместо човечки капитал“, рече директорот Деспотовски.

Презентација на проекти од Стартапувај во „Јавна соба“, DFITR Jovan Despotovski

ВИДЕО: Претставен концептот на новиот Научно-технолошки парк во Скопје

Фондот за иновации и технолошки развој (ФИТР) го претставува концептот на новиот Научно-технолошки парк во Скопје. Проектот ќе се гради во три фази, а видеото од концептот на Научно технолошкиот парк е достапно на следниот линк:

Основањето на Паркот е иницијатива на Владата на Република Северна Македонија, а се спроведува од страна на Фондот за иновации и технолошки развој и Министерството за информатичко општество и администрација. Има за цел забрзан економски раст и побрз приклучок кон светските економски и општествени текови. Научно-технолошкиот парк е простор кој под еден кров нуди инфраструктура, услуги и пристап до финансии што ќе поттикнат раст базиран на ризик, знаење и иновации и ризик. Истовремено, Паркот ќе биде место за контакт и соработка помеѓу академската заедница, студентите, бизнисите и инвеститорите.

Оваа недела беше отворен Деловно-технолошкиот акцелератор УКИМ за млади претприемачи и иноватори, кој е дел од првата фаза од Научно-технолошкиот парк. Акцелераторот е сместен во кампусот на техничките факултети во Скопје, а за оваа намена, Владата во соработка со Светската банка ги обезбеди првите половина милион евра инвестиции. Тука, се предвидени почетни инвестиции до 25.000 евра по компанија, како и до 75.000 евра во втората инвестициска фаза за стартапите со потенцијал за брз раст.

На настанот свои обраќања имаа претседателот на Владата на Република Северна Македонија, Зоран Заев, министерот за информатичко општество и администрација, Дамјан Манчевски, еврокомесарката за дигитална економија и општество, Мариа Габриел, како и директорот на ФИТР, Јован Деспотовски.

Втората и третата фаза на Научно технолошкиот парк предвидуваат изградба на нови згради и лаборатории, кои се очекува да бидат завршени до 2024 година (втора фаза) односно до 2027 година (трета фаза).

Студијата за изводливост е подготвена со финансиска и техничка поддршка од Делегацијата на ЕУ во Скопје. Вкупната проценета инвестиција во Научно-технолошкиот парк за сите три фази е околу 80 милиони евра.

Почнува со работа Деловно-технолошки акцелератор УКИМ, дел од Научно-технолошки парк

Претседателот на Владата Република Северна Македонија, Зоран Заев, денеска присуствуваше и се обрати на отворањето на Деловно-технолошкиот акцелератор за млади претприемачи и иноватори, во рамки на Научно-технолошкиот парк, сместен во кампусот на техничките факултети во Скопје.

На настанот, кој го модерираше директорот на Фондот за иновации и технолошки развој, Јован Деспотовски се обратија и министерот за информатичко општество и администрација и еврокомесарката за дигитална економија и општество, Мариа Габриел, која е во посета на Скопје, во рамки на нејзината работна посета на регионот на Западен Балкан.

„Очекувам и не се сомневам, дека Научно-технолошкиот парк ќе прерасне во место каде граѓаните ќе развиваат нови вештини, ќе се раѓаат нови идеи, ќе се креираат важни иновации и изуми, некои млади луѓе тука ќе започнат и нови стартап бизниси, со еден збор ќе се трасира патот на нашиот развој – патот кон напредокот и дигиталната револуција!“, истакна премиерот Заев, кој ја поздрави еврокомесарката Габриел заблагодарувајќи се за нејзиното присуство на настанот, кој премиерот Заев го оцени како важен во напорите за обезбедување на сигурна економска иднина за сите граѓани во земјата, која ја исполнува дигиталната интеграција, како дел од патот за интеграција во Европската Унија.

Комесарката Габриел изјави: „Ми претставува огромно задоволство што ја посетувам вашата земја да поразговараме за напредокот во спроведувањето на Дигиталната агенда за Западен Балкан и да оцениме заедно со Министрите од шесте Земји на Западен Балкан, како да ја забрзаме работата за да имаме конкретни резултати за нашите граѓани. Јас верувам дека регионот може да стане успешна приказна во областа на дигитализација во Европа.”

И министерот Манчевски, кој го води Министерството кое соработува во реализацијата на проектот на Технолошкиот парк, повтори дека Дигиталната трансформација е високо на агендата на Владата, вклучително и на агендата на Европската Унија.

„Ние од Северна Македонија, но и сите држави од регионот мораме да го искористиме овој поволен период, за да го подобриме квалитетот на живот на сите наши граѓани. Но, моторот на дигиталната трансформација не е ниту Владата, ниту институциите. Тоа се ИКТ (информациски и комуникациски технологии) компаниите“, подвлече министерот Манчевски, додавајќи дека иднината е во создавање силен приватен сектор, силни компании кои заедно со институциите ќе работат на ова поле.

Директорот Деспотовски, на настанот, на кој беше претставена и видео-презентација на Технолошкиот парк, истакна дека еден од трите столбови на паркот е Деловно-технолошкиот акцелератор УКИМ, за чии активности, Владата во соработка со Светската банка обезбеди половина милион евра инвестиции.

„Во инвестициската фаза се планираат почетни инвестиции до 25.000 евра по компанија и до 75.000 евра во втората инвестициска фаза за стартапите со потенцијал за брз раст“, рече Деспотовски додавајќи дека се планираат 7 до 12 инвестиции во првата и две до пет инвестиции во втората фаза, проект кој во сите фази ќе чини 80 милиони евра.