Posts

ФИТР воведува нов механизам за поддршка на млади талентирани деца

Фонд за иновации и технолошки развој организираше консултативна дебата за новиот механизам за финансиска поддршка на младите креативци. ФИТР подготви  „Правилник за финансиска поддршка на научно-технолошката извонредност и претприемништвото кај учениците и младите“ – нацрт документ кој има за цел да ги утврди правилата според кои ќе се доделува финансиска и техничка помош на талентирани деца и нивните ментори. Претставници на повеќе образовни институции и граѓански здруженија кои учествуваат на дебатата го оценија овој чекор како позитивен дополнувајќи го со свои сугестии и коментари кои ќе бидат земени во финализирањето на правилникот.

Целта на воспоставувањето на новата мерка е отворање на дополнителни можности за финансирање на младите креативци при што ќе бидат опфатени сите фази, од идентификување на нивниот потенцијал и можности, подготовка за учество на меѓународни натпревари и финансиска поддршка.

Консултативна средба во ФИТР за поддршка на талентирани деца 2

Оваа мерка е наменета за сите образовни установи и здруженија кои спроведуваат активности за поддршка на талентирани ученици и студенти или работат на развој на претприемачки способности кај младите.

“Наша должност како општество е да се грижиме за најталентираните и најспособните, но и на сите да им овозможиме еднаков и фер пристап до поддршка за да ги реализираат сопствените потенцијали. Оваа мерка има за цел намалување на одливот на мозоци и унапредување на вештините на талентираните деца потребни за нивно вклучување и лидерство во иновативните и технолошки напредни индустрии. Ова е процес со кој вистински и конкретно ќе вложиме во иднината на оваа држава. Бидејќи вложување во младите е вложување во нашата иднина “, посочи Јован Деспотовски, директор на Фондот за иновации и технолошки развој.

Инаку со овој механизам поддршката за научно-технолошка извонредност и претприемништво кај учениците и младите ќе се доделува во вид на грант во износ од минимум 30.000 (триесет илјади) денари до максимум 600.000 (шестотини илјади) денари. Грантот може да го покрива целиот износ на потребното финансирање за предвидените активности. Кофинансирањето обезбедено од други извори, ќе се земе во предвид при бодувањето на апликациите.

Нацрт документот во следните 15 дена ќе биде објавен и на веб страната на Фондот (www.fitr.mk) со цел и пошироката јавност да се вклучи со конструктивни коментари и сугестии. Финалната верзија на документот потоа ќе биде доставена до Владата на Република Северна Македонија.

Консултативна средба во ФИТР за поддршка на талентирани деца 3

Инаку оваа мерка е дел од пошироката иницијатива на ФИТР од почетокот на 2019 за креирање на т.н. „Фонд за млади умови“- системско решение со кое државата во иднина ќе вложува во развивање и поддршка на таленти кај младите. Во рамките на овој Фонд веќе се интегрирани програмите „Џуниор Ачивмент“, UPSHIFT и Предизвик за млади истражувачи, наменети за ученици од основно и средно.

ФИТР само во изминатата година има инвестирано околу 20 милиони денари во реализација на програми наменети за млади и деца од различни возрасти, со цел поттикнување на нивното критичко размислување и иновативност. Преку програмите на Фондот до сега се поддржани 54 средни и основни училишта со над 500 вклучени ученици и ментори.

Вклучи се во анкетата на ФИТР

Како институција која што цели постојано да ги менува работите и вложува во промени (економски и општествени), многу ни значи вашиот став и размислување на прашањата од анкетата која е достапна на следниот линк:

https://docs.google.com/forms/d/1JrQaPw8ApC7UGtQgxZFIU05QCUMnagrJXk4delfKuQw

Анкетата е изработена од студенти на Економскиот факултет во Скопје, отсек маркетинг во соработка со студенти од Правниот факултет во Скопје, отсек за односи со јавност.

Ви благодариме. Заедно да продолжиме да креираме успешни приказни!

ФИТР во партнерство со УСАИД ги зајакнува претприемачките вештини кај младите

Фондот за иновации и технолошки развој и Агенцијата за меѓународен развој на Соединетите Американски Држави (УСАИД) потпишаа меморандум за соработка, со кој двете агенции се обврзуваат заеднички да работат на зголемување на можностите на младите лица во државата.

Целта на овој меморандум е засилување на позицијата на младите во Северна Македонија, преку креирање обуки и тренинзи за зголемување на нивната вработливост и поттикнување на нивните потенцијали за развој на вештини што им се потребни за да оформат сопствен бизнис или пак за да добијат работа.  Преку оваа соработка треба да им се овозможи на младите да стекнат практично искуство за водење бизнис и развивање на нови вештини како што се тимска работа, лидерство, презентирање, планирање и финансиско работење, потребни за успешно водење на економијата и создавање на бизнис ориентирана младина, што е еден од столбовите за самоодржливост на  земјата.

Меморандум за соработка помеѓу ФИТР и УСАИД 2

Меморандумот го потпишаа директорот на ФИТР, Јован Деспотовски и Ерик Јановски, претставник на УСАИД за Северна Македонија. Двајцата изразија подготвеност за заедничко делување и искрена соработка во ова поле.

„Во партнерство со Американската агенција за меѓународен развој, ФИТР покажува дека како држава активно работиме на зголемување на можностите и поттикнување на младите да создаваат успешни приказни дома наместо да ја гледаат својата иднина во странство. Со ваквите програми нудиме соодветна финансиска поддршка и менторство да ги реализираат своите иновативни бизнис идеи.

ФИТР до сега има инвестирано во над 100 стартап компании преку неколку инструменти за поддршка, а наскоро ќе објавиме и нов повик за поддршка на стартап компании со зголемен буџет од 1,5 милиони евра. Дополнително, заедно со нашите американски партнери, работиме и на засилување на социјалното претприемништво во нашата земја, преку конкретни образовни програми чија цел е поттикнување токму на овој вид претприемништво и развивање меки вештини. Искрено верувам дека овој меморандум е официјализирање на една длабока и плодна соработка која ќе продолжи и во иднина,“ истакна Деспотовски.

Меморандум за соработка помеѓу ФИТР и УСАИД 3

„Горди сме што стануваме партнери на Фондот за иновации и технолошки развој во поттикнувањето на претпириемачкото образование во средните училишта. Преку ваквото партнерство, заедничка цел ни е да ги инспирираме и подготвиме младите луѓе  да успеат во глобалната економија, преку развој и имплементација на програмите за претприемничко образование, финансиска писменост и работна подготвеност,“ изјави Ерик Јановски.

Со овој меморандум за соработка, Фондот и УСАИД меѓу другото се обврзуваат да спроведат неколку иновациски кампови во учебната 2019-2020 година; да реализираат национален натпревар за најдобра студентска компанија, да организираат обуки за средношколски професори преку програмата „Џуниор Ачивмент“, и поддршка за добитниот тим од националниот натпревар за најдобра студентска компанија да учествува на меѓународниот натпревар за најдобра студентска компанија за оваа академска година.

ФИТР и МАНУ потпишаа Меморандум за соработка и поттикнување на иновативноста и претприемништвото кај младите

Фондот за иновации и технолошки развој и МАНУ потпишаа Меморандум за соработка кој ќе опфати покренување на заеднички проекти и студии од областите на претприемништвото, иновациите, истражувањето и технолошкиот развој.

„МАНУ активно ќе се вклучи во изработка на стратешката програма за поттикнување на креативното размислување, иновативноста и претприемништвото кај младите, наречен „Фонд за млади умови“ на ФИТР, но и ќе се продлабочи соработка во конципирање на финансиски инструменти за поттикнување на истражувачките активности на академската заедница,“ истакна  претседателот на Академијата, Таки Фити.

Целта на овој договор е и стимулирање на конкурентноста преку истражување на можни инструменти за креирање иновативни политики, како и политики поврзани со образование и поддршка на мобилноста помеѓу академијата и индустријата, вклучувајќи и меѓународна мобилност на ученици, студенти и претставници на академската заедница.

MoU MoU потпишување ФИТР и МАНУ 2potpisuvanje FITR i MANU 2

„Потпишувањето на договорот за соработка со една од најзначајните национални институции претставува задоволство и голема чест за Фондот но и за мене лично. Разговаравме за повеќе конкретни проекти и очекуваме целосна поддршка од МАНУ во иницијативите кои ни претстојат и за кои заеднички ќе аплицираме пред меѓународните фондови. Со задоволство ќе ја прифатиме понудената можност акумулираното знаење од Академијата да го искористиме во делот на економијата и одржливиот развој.“, изјави директорот на ФИТР, Јован Деспотовски.

Двете институции преку билатералната соработка ќе имаат заеднички проекти за финансирање на меѓусебните истражувачки активности и пред домашните државни институции, приватниот сектор,  вклучувајќи притоа и заемна помош при подготовка на проектната документација.

Во мај годинава ФИТР во соработка со МАНУ, Природно-математичкиот факултет при Универзитетот „Свети Кирил и Методиј” во Скопје организиираа „Денови на ЦЕРН во Северна Македонија“ во чии рамки се одржаа серија настани и изложби.

Ученици, родители, професори и експерти активно вклучени во иницијативата за развој на „Фонд на млади умови“ на ФИТР

Анализа на постојните инструменти за поддршка на мотивирани ученици, пропусти во системот, последици од неквалитетните реформи како и проблемите со кои се соочува наставниот кадар и учениците, беа меѓу главните теми на дискусија на четирите фокус групи што се одржаа на 8 и 9 јули во организација на Фонд за иновации и технолошки развој.

Целта на фокус групите беше собирање податоци кои потоа ќе се искористат во креирањето на стратешката програма за поттикнување на креативното размислување, иновативноста и претприемништвото кај младите, наречен „Фонд за млади умови“  на која ФИТР веќе работи повеќе месеци

Во дводневните дискусии беа вклучени претставници на Министерството за образование и наука, Бирото за развој на образованието, Академијата за науките и уметностите, како и универзитетски професори, членови на стручните служби во училиштата, невладини организации, и засегнати родители и студенти.

Фокус групи фото 2

„Најважно во овој процес во кој сакаме да создадеме програма заснована на потребите на младите, е сите тие инстанци што спроведуваат различни програми да имаат глас, бидејќи нашата цел не е да создадеме нешто ново, туку да надградиме на нешто што веќе функционира. Поради тоа треба да дознаеме кои се програмите засновани на докази што се успешни во земјата, и како да ги надградиме на национално ниво, но и да ги идентификуваме празнините и потребите,“ истакна д-р Ребека Елис, меѓународен експерт и соработник на Фондот и УНИЦЕФ С. Македонија која работи и на изготвувањето на националната програма за поттикнување на креативноста, иновативноста и претприемништвото кај младите и која ги водеше дводневните фокус групи.

Освен стручниот кадар од училиштата и родителите покажаа огромен интерес за креирање на една ваква стратешка програма за поддршка на младите, додека пак средношколците и студентите отворено зборуваа за нивните потреби и интереси, и даваа конкретни предлози за тоа како да се надминат моменталните недостатоци.

Враќање на секциите како воннаставни активности во училиштата, опремени лаборатории и кабинети, дополнителни часови на кои ученците ќе бидат слободни да ја изразат сопствената креативност, но и намалување на административната работа на наставниците, обуки за професорите да препознаваат талентирани деца беа некои од понудените можни решенија и мерки од учесниците.

Одржувањето на фокус групите беше следниот чекор по големата панел дискусија за развој и поддршка на талентирани деца што ФИТР ја организираше во март годинава со цел да се детектираат појдовните точки за креирање системско решение со кое државата во иднина ќе вложува во развивање на талентите и т.н. „меки вештини“ кај младите.

Стратешка програма за поттикнување на креативното размислување, иновативноста и претприемништвото кај младите – „Фонд за млади умови“ на ФИТР, предвидено е да опфати поддршка преку веќе постоечки успешни иницијативи, да понуди нови мерки на поддршка за поттикнување на креативноста, иновативноста и претприемништвото кај младите, како и негување и унапредување на талентите кај децата.

Целта на оваа иницијатива на Фондот е да се креира системско решение со кое државата во иднина ќе вложува во развивање и поддршка на таленти кај младите.

Фокус групи за развој на стратешката програма – „Фонд за млади умови“ на ФИТР

Во организација на Фонд за иновации и технолошки развој, на 8 и 9 јули во „Јавна соба“ во Скопје, ученици, родители, наставници и професори, како и претставници на државни институции и независни експерти во четири фокус-групи ќе дискутираат за изработка на национална програма за талентирани и надарени деца. Ова е дел од повеќемесечната иницијатива на ФИТР за развивање на стратешка програма за поттикнување на креативното размислување, иновативноста и претприемништвото кај младите – „Фонд за млади умови“.

Со цел вклучување на сите релевантни чинители во процесот на изготвување на оваа програма која треба да се спроведува на национално ниво ќе се одржат 4 посебни дискусии со различни фактори вклучувајќи претставници на разни научни здруженија и асоцијации, Министерство за образование и наука, Биро за развој на образованието, разни владини агенции за спроведување образовни програми, како и претставници на високообразовните институции во државата, претставници на УНИЦЕФ Северна Македонија,  USAID, неколку амбасади, невладиниот сектор, а посебни фокус групи се  наменети за наставниот и стручниот кадар во училиштата и засегнати родители и ученици.

Pokana_za_uchestvo_fokus_grupi_27-06-2019

Фокус групите ќе бидат водени од меѓународен експерт Др. Ребека Елис од УНИЦЕФ С. Македонија, кој е еден од главните партнери на ФИТР во изготвувањето на концептот на националната програма. Меѓу другото ќе се дискутираат постоечките инструменти за поддршка, можните аспекти за подобрување, реалните потреби на учениците, како и системските недостатоци што треба да се пополнат со конкретни мерки.

Стратешка програма за поттикнување на креативното размислување, иновативноста и претприемништвото кај младите – „Фонд за млади умови“ на ФИТР, предвидено е да опфати поддршка преку веќе постоечки успешни иницијативи, да понуди нови мерки на поддршка за поттикнување на креативноста, иновативноста и претприемништвото кај младите, како и негување и унапредување на талентите кај децата.

Инаку иницијативата на ФИТР за поддршка и развој на талентирани деца започна во март со голема панел дискусија „Развој и поддршка на талентирани деца, а целта е цел да се креира системско решение со кое државата во иднина ќе вложува во развивање и поддршка на таленти кај младите.

Фокус групите се од отворен карактер и во нив може да учествуваат сите кои сакаат да придонесат кон успешна дискусија од која ќе произлезат конкретни насоки и резултати.

Повеќе информации за распоредот и термините на www.fitr.mk

Финансиска поддршка од ФИТР за учество на ученици на повеќе меѓународни натпревари и олимпијади

Фондот за иновации и технолошки развој (ФИТР) ќе го поддржи учеството на меѓународни натпревари и олимпијади на ученици од тимовите на “Друштвото на физичари на Македонија“, „Сојузот на техничари и технолози на Македонија“, Фондацијата за промовирање на иновативно учење, едукација и личен развој Стем Академија и од ОУ “Јохан Хајхрих Песталоци” од Скопје.

Тимот на учениците физичари од „Друштвото на физичари на Македонија“, кој ФИТР го поддржа и минатата година на Олимпијадата во Боцвана од каде се вратија со три бронзени медали, во јули ќе се натпреварува на 50та Меѓународна олимпијада по физика во Тел Авив.

Талентираните ученци хемичари ќе не претставуваат на 51та Интернационална Олимпијада по хемија која ќе се одржи во јули во Париз, а ученици од ОУ „Јохан Хајнрих Песталоци“ кои освоија златни и сребрени медали на регионалниот натпревар во Скопје се квалификуваа за учество во глобалниот напревар „World Schollars Cup“ кој ќе се одржи во Хаг во јули.

Тимот SPACE WALKERS, составен од деца кои посетуваат часови по наука, технологија, инженерство и математика во рамките на СТЕМ Академија, благодарение на успехот постигнат во Цеље на финалето во Адриа FIRST LEGO LEAGUE, натпревар во кој е насочен на едукативна роботика, се пласираше на светско првенство на FLL лигата во Либан кој се одржува во јуни 2019 година.

Средствата се обезбедени од ФИТР со пренамена на тековните трошоци на Фондот. Ова е дел од Програмата за поддршка и развој на таленти“ која ја развива ФИТР во соработка со УНИЦЕФ. Тим од професори, претставници на академската фела и ФИТР неколку месеци работат на изготвување концепт кој треба предложи системско решение кое ќе вклучува инструменти за поддршка на талентираните деца и координирани активности како и иницијативи на сите релевантни институции.

Оваа иницијатива е произлезена од бројните барања за поддршка на ученици од страна на ФИТР, како и од програмата за поддршка на млади истражувачи која прв пат беше објавена во ноември 2017 година.

Инаку ФИТР само во изминатата година има инвестирано близу 10 милиони денари во реализација на програми наменети за млади и деца од различни возрасти, со цел поттикнување на нивната критичка мисла и иновативност.

Мини-изложба на иновативни ученички проекти поддржани од ФИТР

Во рамките на иницијативата Петок за млади на Фонд за иновации и технолошки развј денеска беше направена мини-изложба на ученички проекти поддржани од страна на Фондот за иновации и технолошки развој (ФИТР) преку програмите „Предизвик за млади истражувачи“ и „UPSHIFT“. Настанот беше во изложбениот простор на Академијата за науките и уметностите (МАНУ) каде се оддржуваат „Денови на ЦЕРН во Република Северна Македонија“.

Креативните средношколци од гимназијата „Киро Спанџов Брко“ и од Кавадарци и двете скопски гимназии „Георги Димитров“ и „Орце Николов“ ги претставија своите проекти и го објаснија целиот процес на работење од идеја до реализација на иновацијата.

Петок за млади во рамки на Денови на Церн во РС Македонија 2

Средношколците од Кавадарци работат на повеќе проекти меѓи кои и интерактивна паметна табла која ја заменува класичната школска табла на која може да се пишува со паметен покажувач наместо со креда, и канти за отпадоци со систем за рециклирање на пластични шишиња и конзерви.

Петок за млади во рамки на Денови на Церн во РС Македонија 4

Тимот на скопската гимназија „Георги Димитров“ направи повеќенаменски дрон со кој прскањето на шумските предели со пестициди ќе може да се прави центрирано наместо низ широки површини со што ќе се заштити екосистемот а особено пчелите кои најмногу страдаат при користењето на пестициди.

Иновацијата на учениците од гинмназијата „Орце Николов“ од Скопје е статичен велосипед опремен со механизам кој преку ротирање на педалите полни мобилни телефони. Иновацијата придонесува за развивање на здрави навики и заштеда на електрична енергија.

Петок за млади во рамки на Денови на Церн во РС Македонија 3

Ученците од трите гимназии имаа прилка и да се запознаат со истражувањата и работата на ЦЕРН преку изложба и атомските интерактивни игри.

„Изложбата на Европската организација за нуклеарни истражувања (ЦЕРН) е еден од механизмите преку кои сакаме да го поттикнеме критичкото и креативното размислување кај младите. Со поддршката која им ја дава ФИТР преку програмите „Предизвик за млади истражувачи“ и „UPSHIFT“ ги мотивираме и им олеснуваме при реализирање на идеите,“ посочи Николина Стојановска Трајковска од ФИТР.

Манифестацијата „Денови на ЦЕРН во Република Северна Македонија“ беше отворена на 13 мај, 2019 година во организација на ФИТР, со поддршка на Природноматематички факултет при УКИМ и МАНУ и трае се до денес.

Петок за млади во рамки на Денови на Церн во РС Македонија 5