Posts

34 училишта наградени на „Предизвик за млади истражувачи 2“ на ФИТР

Триесет и четири проекти на основни и средни училишта од земјава се наградени на „Предизвик за млади истражувачи 2“ кој Фондот за иновации и технолошки развој го организира во соработка со Министерството за образование и наука.

На финалниот настан кој денеска се оддржа во градскиот парк во Скопје, директорот на ФИТР, Јован Деспотовски порача:

„Навистина охрабрува и огромниот интерес и денешното присуство на основци и средношколци од буквално целата земја. Сите што учествуваа на предизвикот се победници затоа што се одважија своите иновативни идеи да ги претворат во одлични проекти и да го предизвикаат Фондот да обезбеди поголема поддршка. ФИТР одговори на тој предизвик, и наместо предвидените 2.5 милиони денари, денеска доделуваме 6 милиони денари. Секој денар вложен во овие млади луѓе верувам дека повеќекратно ќе се врати во нашето општество.“

Деспотовски најави и дека ваков предизвик ќе биде организиран и следната година.

Предизвик за млади истражувачи 2 во Градски парк 2

Со свои мотивациски говори, кои имаа за цел да ги охрабратат младите луѓе, на настанот се обратија и Изабела Пан, Марко Лазетиќ од скопската гимназија „Ѓорѓи Димитров“ (минатогодишен добитник на награда во рамки на Предизвикот) и Бодан Велковски од компанијата Смартек системи – компанија корисник на средства од ФИТР.

Комисијата за избор и оценување одлучи да им додели финансиска поддршка на проектите од дваесет основни и четиринаесет средни училишта од целата држава. Проектите се од различни области меѓу кои астрономија, земјоделие, екологија, машинство и ИТ.

Покрај финансиската поддршка за тимовите, дополнителни 30.000 денари се предвидени за наставниците кои ги менторираат проектите – средства наменети за обуки, семинари, конференции кои што би придонеле кон поуспешна реализација на проектот.

Предизвик за млади истражувачи 2 во Градски парк 3

Комисијата за избор и одлучување беше во состав: Нуран Кадриу Џамбази – претставник од Сектор средно образование при МОН, Верица Златанска Пауновска – претставник од Сектор основно образование при МОН, М-р Валентина Гоцевска и М-р Владо Стојанов – претставници од Бирото за развој на образование, Олга Самарџиќ Јанкова, претставник на Здружение за унапредување на обазованието КОНЕДУ ГЛОБАЛ од Скопје, Ема Зафирова, и Катарина Кречева и Неда Икономова Гавриловска од ФИТР.

Во рамките на „Предизвик за млади истражувачи 2“ се пријавија 88 основни и средни училишта. Предизвикот беше отворен од 01 февруари до 31 март 2019 година со цел поттикнување на критичко и креативно размислување кај младите во нивниот развој и стимулирање на иновативни идеи и акции во процесот на образование во основните и средните училишта во Северна Македонија.

Предизвик за млади истражувачи 2 во Градски парк 4