Posts

Јавен повик на ФИТР за технолошки развој – Олеснет пристапот до финансиска поддршка

Фондот за иновации и технолошки развој (ФИТР) го објави вториот повик од Планот за економски раст на Владата (ПЕР), наменет за ко-финансирани грантови за технолошки развој. Повикот е наменет за микро, мали и средни претпријатија и приватни здравствени установи (ПЗУ) кои сакаат да го унапредат нивото на технолошки развој.

Директорот на Фондот, Јован Деспотовски кој го презентираше инструментот најави  дека со овој повик се воведува и олеснета процедура за аплицирање.

„Покрај редовната постапка компаниите од сега ќе може да аплицираат и по скратена односно “fast track” постапка. Апликантите кои ја поминале фазата на административна проверка и претселекција, но не биле избрани за кофинансирање сега можат повторно да аплицираат на јавен повик со истиот, односно подобрен предлог проект. Со ова се намалуваат и трошоците за компаниите, но и на Фондот, а  значително се намалува времето од аплицирање до одлука на Комитетот,“ истакна Деспотовски.

Вкупниот буџет за повикот е 6 милиони евра, односно по три милиони за скратена, и три милиони евра за редовна постапка. Со овој повик владата обезбедува до 30% во максимален износ од 10 милиони денари, а останатите 70 % се влог на компаниите.

Во однос на делот за сопствено ко-финансирање Деспотовски објави дека иницијативата на Фондот и Македонската банкарска асоцијација за дополнителна финансиска поддршка на домашните иновативни компании веќе дава конкретни резултати.

“НЛБ банка воведе НЛБ Иноватор пакет во соработка со Фондот со кој им овозможува на најиновативните компании да користат одредени привилегии и продукти меѓу кои и краткорочен и долгорочен денарски кредит со пониски каматни стапки. Банките го препознаваат потенцијалот на домашните компании и сакаат да вложуваат во нивниот раст. Очекувам по овој пример и останатите банки, согласно своето работење, поактивно да се вклучат во кофинансирање на програмите за иновации и технолошки развој,“ нагласи Деспотовски и додаде дека Фондот ќе продолжи да работи на отворање нови можности за финансирање и олеснети процедури за домашните компании бидејќи резултатите од досегашните вложувања се охрабрувачки и мотивирачки.

За потребите на инвестициите за микро претпријатија и ПЗУ (претпријатија и ПЗУ чиј просечен број на вработени е до 10 вработени и чиј годишен приход во последните две години е помал од 50,000.00 евра) – финансирањето ќе изнесува максимален износ од 5 милиони денари. За мали и средни претпријатија и ПЗУ (претпријатија и ПЗУ чиј просечен број на вработени е од 10  до 250 вработени и чиј годишен приход во последните две години е поголем од 50,000.00 евра а помал од 10,000,000.00 евра)  ќе биде овозможено финансирање во максимален износ од 10 милиони денари.

Креативно решение за јавен повик за Кофинансирани грантови за технолошки развој

Средствата ќе се исплаќаат на квартална основа, согласно динамиката на реализација на проектниот план, по претходна уплата на сопственото учество на компанијата и извршен мониторинг на реализација на активностите од страна на Фондот.

Во однос на активностите кои ќе бидат поддржани во рамките на одобрените проекти меѓу другото е и прифаќање и спроведување на европските технички прописи во однос на безбедноста на производите, подготовки за стекнување сертификати за квалитет, активности за подобрување на енергетската ефикасност, подготовка на развојни проекти за деловно поврзување и воспоставување на деловна соработка со странски инвеститори и домашни претпријатија, подобрување на организационата структура за задоволување на растот на фирмата, специјализирани менаџмент обуки, набавка или изработка на специфичен софтвер поврзан со подобрување на организациската структура и перформансот или за подобрување на оперативните процеси кои ќе ја зголемат продуктивноста и/или процесот на планирање и сл.

Во периодот на аплицирање за домашните компании  ФИТР ќе обезбеди користење на бесплатна советодавна поддршка и техничка помош. Дополнително, со цел информирање за деталите од повикот, условите и можностите за аплицирање, Фондот ќе реализира и повеќе информативни сесии во соработка со стопанските комори и други организации.

Евалуацијата на пристигнатите предлог апликации ќе се врши во две фази: првата фаза на претселекција ќе ја вршат надворешни стручни лица, домашни експерти од 22 економски дејности. Во втората финална фаза, проектите ќе ги разгледува Комитетот за одобрување на инвестиции, составен од пет странски експерти, кој ја носи конечната одлука за финансирање. Компаниите и нивните инвестициски предлози ќе се оценуваат по пет категории: технолошки напредок, квалитет на подготвен проект, потенцијал на пазарот, капацитет на проектниот тим и влијание на проектот.

Јавниот повик по редовна постапка ќе биде отворен до 05 февруари, 2020 година а компаниите кои ќе аплицираат по скратената постапка ќе имаат можност тоа да го сторат до 27 декември, 2019 година. Сите информации поврзани со повикот, апликацискиот формулар, како и правилниците и формуларите за оценување се објавени на следниот линк http://www.fitr.mk/tehnoloshki-razvoj/

Досега околу 1000 презмени апликациски пакети за вториот повик од Планот за економски раст на Владата

Фондацијата за поддршка на претпријатија – ЕСА Тетово и Стопанската Комора на Северо-Западна Македoнија во соработка со Фондот за иновации и технолошки развој, организираа презентација поврзана со Инструментот за кофинансирани грантови за комерцијализација на иновации пред компаниите од северозападниот регион и членки на СКСЗМ. На претставниците на компаниите им се обратија министерот за економија, Крешник Бектеши и директорот на ФИТР, Јован Деспотовски.

Министерот Бектеши нагласи дека малите и средните претпријатија се двигатели на инклузивниот економски раст во Република Северна Македонија и во создавањето на продуктивни и одржливи работни места.

Инфо сесија комерцијализација на иновации во Тетово 2

„Со ваквата поддршка сакаме да ја подигнеме конкурентноста на малите и средни компании, за да можат да соработуваат со други компании од земјата и надвор од неа, односно да бидат извозно ориентирани. Крајна цел на целиот тој процес е развој на општеството. Развојот на МСП долгорочно гледано води кон јакнење на целокупната економија,“ рече министерот Бектеши.

Директорот на ФИТР, Јован Деспотовски нагласи дека Фондот ќе продолжи на домашните компании да им обезбедува користење на бесплатна советодавна поддршка и техничка помош.

„ФИТР е отворена државна институција. Настојуваме целосно да ги доближиме програмите, можностите и критериумите до сите компании, во сите региони. Започнавме процес на децентрализиран пристап до информации, советодавни услуги и техничка помош. Тетово е еден од трите први урбани центри кои учествуваат во овој процес. Фактот што во овие три недели од објавувањето на повикот имаме околу 1000 презмени апликациски пакети ни е само мотив повеќе да продолжиме да работиме и понатаму со исто темпо. Тоа истовремено е и знак на доверба на компаниите во иниституцијата и начинот на којшто работиме.“ – изјави Деспотовски.

Инфо сесија комерцијализација на иновации во Тетово 3

Вкупната вредност на предвидените средства за овој инструмент е пет милиони евра, од кои 3 милиони евра обезбедува државата, додека 2 милиони обезбедува Светската банка.

Проектите кои се поддржани со овој инструмент се: истражувачки и развојни активности, активности за тестирање, активности за заштита на интелектуална сопственост, проекти, развој на пилот-линија, активности за обезбедување квалитет, маркетинг и продажба.

Повикот за аплицирање во овој проект е отворен до 15.05.2019 година. Владата ги поттикнува сите што ги исполнуваат условите предвидени да аплицираат за развој на економијата на земјата во целина.

Сите информации поврзани со повикот, апликацискиот формулар како и правилниците и формуларите за оценување се објавени на следниот линк www.fitr.mk/inovacii

ФИТР од денес со децентрализирани информации и поддршка за компаниите

Фондот за иновации и технолошки развој во соработка со Фондацијата за развој на претприемништво, регионална и прекугранична соработка Битола, денеска организираше презентација на Инструментот за кофинансирани грантови за комерцијализација на иновации, на која присуствуваа претставници на педесетина мали, микро и средни претпријатија од Пелагонискиот регион.

„Фондот е отворена државна институција. Целта на овој настан во Битола е на компаниите од Пелагонискиот регион да им ги приближиме инструментите на ФИТР и можностите за финансиска поддршка од државата“, изјави Јован Деспотовски, директор на ФИТР.

Инфо сесија Битола за комерцијализација на иновации 2

Тој додаде и дека Фондот ќе продолжи на домашните компании да им обезбедува користење на бесплатна советодавна поддршка и техничка помош, а за прв пат оваа поддршка ќе се нуди и децентрализирано во Битола. ФИТР во соработка со Фондацијата за развој на претприемништво, регионална и прекугранична соработка како партнерската организација на компаниите од овој регион ќе им обезбеди поддршка на потенцијалните апликанти, и ќе нуди информации поврзани со инструментите, деталите, условите и можностите за аплицирање. Вакви инфо-центри во наредните денови ќе почнат да функционираат и во Тетово и Струмица, во соработка со локални партнерски организации и здруженија.

“Особено не охрабрува фактот што имаме голем интерес кај компаниите за нашите инструменти, што истоврмено е знак на доверба во самата инстутуција и процесите што ги спроведуваме. Последните бројки велат дека од објавувањето на овој јавен повик од крајот на март до сега се преземени околу 850 апликациски пакети при што очекуваме голем дел од нив и да поднесат предлог апликации,“ рече Деспотовски, охрабрувајќи ги компаниите од овој регион да инвестираат во развој на иновативни проекти.

Инфо сесија Битола за комерцијализација на иновации 3

Инаку, јавниот повик за Инструментот за кофинансирани грантови за комерцијализација на иновации е отворен до 15.05.2019 година, и тој има за цел да се поттикне зголемување на активностите за истражување и развој во приватниот сектор, да се охрабри соработката меѓу приватниот сектор и приватниот сектор со високообразовните и научноистражувачките установи, како и останатите форми на соработка за комерцијализација на иновации.

Сите информации поврзани со повикот, апликацискиот формулар, како и правилниците и формуларите за оценување се објавени на следниот линк: www.fitr.mk/inovacii

Проектот „Вином“ на компанијата Био Инжинеринг со поддршка од ФИТР

Проектот „Вином“ на компанијата Био Инжинеринг има за цел да им помогне на малите винарници да станат се поконкурентни на пазарот на производство на новите персонализирани вина.

„Нашата компанија е основана во 1998 година, значи веќе постоиме 20 години. Моментално се наоѓаме во нашиот истражувачки центар за примената микробиологија и биотехнологија, каде што ќе се работи и проектот „Вином“ кој е финансиран од Фондот за иновации и технолошки развој. Целта на овој проект е изолација на геолокални, автохтони македонски квасци од домашните лозја.“, велат од компанијата Био Инжинеринг.

Тие истакнуваат дека со ова за прв пат во нашата историја се атакува ваков проблем и се надеваат дека со тоа ќе го откриеме скриеното енолошко богатство кое го кријат нашите лозја во однос на автохтони македонски квасци.

„Фондот со нивниот грант ни помага да набавиме дополнителна опрема со која ќе успееме да го завршиме овој проект, како и да го прошириме нашиот капацитет во однос на вработување на нови млади кадри во полето на применетата микробиологија.“, истакнува претставникот на компанијата во видеото.

Компанијата Био Инжинеринг е една од над 130 домашни компании/конзорциуми поддржани од Фондот за иновации и технолошки развој во рамките на првиот јавен повик од Планот за економски раст на Влада на Република Северна Македонија.

Со првиот и вториот инвестициски бран се реализираат инвестиции во домашниот приватен сектор во износ од 28 милиони евра. Се ангажираат над 780 лица, од кои 158 се нови работни места, со просечна плата од 45.000 денари.

ФИТР го објави вториот повик во рамки на Планот за економски раст на Владата

Фондот за иновации и технолошки развој го објави вториот повик од Планот за економски раст на Владата (ПЕР), наменет за ко-финансирани грантови за комерцијализација на иновации. Повикот е наменет за ситемикро, мали и средни претпријатија и приватни здравствени установи (ПЗУ) со доминантна домашна сопственост кои сакаат да развијат иновативен производ, услуга или процес.

Со овој повик, Владата обезбедува до 70% ко-финансирање за микро и мали односно до 60% за средни компании во максимален износ од 20 милиони денари. Средствата ќе се исплаќаат на квартална основа, согласно динамиката на реализација на проектниот план, по претходна уплата на сопственото учество на компанијата и извршен мониторинг на реализација на активностите од страна на Фондот.

Целта на Инструментот е да поттикне зголемување на активности за истражување и развој во приватниот сектор, да се охрабри меѓусебна соработката на компаниите, соработка со високообразовните и научноистражувачките установи, како и останати форми на соработка за комерцијализација на иновации

Вкупен износ на средства на вториот јавен повик во рамките на ПЕР, е 5 милиони ЕУР од кои 2 милиони обезбедува Светската банка. Со ова, Светската банка станува финансиски партнер на ФИТР и Владата во реализација на Планот за економски раст, во делот на комерцијализација на иновациите.

Вториот јавен повик е отворен од денес (30.03.2019) до 15 мај 2019 година. Во периодот на аплицирање, домашните компании ќе имаат можност за користење на бесплатна советодавна поддршка од ФИТР. За прв пат оваа поддршка ќе се нуди и децентрализирано, во Тетово, Струмица и Битола, во соработка со локални и регионални партнерски организации. Дополнително, со цел информирање за деталите од повикот, условите и можностите за аплицирање, Фондот ќе реализира и повеќе информативни сесии во соработка со стопанските комори и други организации.

Евалуацијата на пристигнатите инвестициски предлози ќе се врши во две фази: првата фаза на претселекција ќе ја вршат надворешни стручни лица, домашни експерти од 22 економски дејности. Во втора фаза, проектите ќе ги разгледува Комитетот за одобрување на инвестиции, составен од пет странски експерти, кој ја носи конечната одлука за финансирање. Компаниите и нивните инвестициски предлози ќе се оценуваат по пет категории: степен на иновативност, квалитет на подготвен проект, потенцијал на пазарот, капацитет на апликант и влијание на проектот.

Сите информации поврзани со повикот, апликацискиот формулар како и правилниците и формуларите за оценување се објавени на следниот линк www.fitr.mk/inovacii

ФИТР со поддршка на проект на Аквапоника

Проектот „Брендирани млади органски салати“ на компанијата Аквапоника има за цел да развие максимален квалитет во производството, а на потрошувачите да им понуди нова линија на млади органски салати и да ја зголеми довербата во органското производство во земјава.

„Аквапоника е мало земјоделско стопанство, што се наоѓа во село Орешани, недалеку од Скопје. Се занимаваме со производство на органски зеленчук, а пред се на органски салати. Со овој проект кој е поддржан од #ФИТР на нашите потрошувачи ќе им понудиме нова линија на млади органски салати. Се работи за рукола, марула, спанаќ и блитва чии ливчиња не се поголеми од 10 сантиметри, а кои веднаш по бербата, токму тука, на нива, ќе ги измиеме и ќе ги спакуваме. По тоа ќе ги дистрибуираме, обидувајќи се целата свежина од нивата да ја донесеме во Вашата чинија дома.“, велат од компанијата Аквапоника.

Тие истакнуваат дека на овој начин сакаат да постигнат максимален квалитет, но и да ја зголемат довербата на нивните потрошувачи во органското производство.

„Целата наша приказна ќе ја раскажеме во брендот што ќе биде развиен во текот на овој проект. Се надеваме дека на овој начин ќе ги поттикнеме и останатите земјоделци да размислуваат на одржлив развој на органското земјоделство, а кај потрошувачите ќе поттикнеме здрави навики во исхраната, но и потрошувачки навики со поголема одговорност за животната средина.“, истакнува претставничката на компанијата во видеото.

Компанијата Аквапоника е една од над 130 домашни компании/конзорциуми поддржани од ФИТР во рамките на првиот јавен повик од Планот за економски раст на Владата на Република Северна Македонија.

Со првиот и вториот инвестициски бран се реализираат инвестиции во домашниот приватен сектор во износ од 28 милиони евра. Се ангажираат над 780 лица, од кои 158 се нови работни места, со просечна плата од 45.000 денари.

Поддршка од ФИТР за проект на компанијата „Таргет груп“

Проектот „Развој на модули на Бизнис Мрежа.мк Развој на нов производ Credit Information Solutions“ на компанијата Таргет груп има за цел надградба на веќе постоечка платформа за деловни информации, како и изградба на сосема нова платформа за изработка и продажба на бонитетни извештаи за компании од регионот.

„Проектот за кој нашата компанија доби грант за кофинансирање од страна на #ФИТР е поделен во два дела. Првиот дел се однесува на надградба на веќе постоечка платформа за деловни информации: biznismreza.mk и се предвидува развој на нови модули кои што ќе ја олеснат употребата на самите клиенти. Во вториот дел предвидуваме изградба на сосема нова платформа за изработка и продажба на бонитетни извештаи за компании од регионот на поранешна Југославија и компании што соработуваат со нив од целиот свет, а се предвидува и платформата да биде пласирана на глобално ниво со цел да ги задоволи потребите на сите компании без разлика на регионот со кои што работат“, велат од компанијата Таргет Груп.

Тие истакнуваат дека во самиот тек на проектот се предвидени четири нови вработувања, а дополнително по истекот на проектот со секои нови четири до пет држави што се вклучуваат на платформата се очекува дополнително вработување.

„Што се однесува до бенефитите за домашните компании, тие ќе имаат лесен пристап до деловни податоци за партнери од странство со кои што немале досега соработка, така што ќе се олесни целокупното работење на сите локални компании.“, истакнува претставникот на компанијата во видеото.

Компанијата Таргет Груп е една од над 130 домашни компании/конзорциуми поддржани од Фондот за иновации и технолошки развој во рамките на првиот јавен повик од Планот за економски раст на Влада на Република Македонија.

Со првиот и вториот инвестициски бран се реализираат инвестиции во домашниот приватен сектор во износ од 28 милиони евра. Се ангажираат над 780 лица, од кои 158 се нови работни места, со просечна плата од 45.000 денари.

Одржана инфо сесија за јавниот повик „СтартАПувај“ во Охрид

Претставници на Фондот за иновации и технолошки развој (ФИТР) одржаа Инфо сесија за јавниот повик „Стартапувај“ во Охрид. Настанот се одржа на 23.11.2018 година во просториите на Факултетот за туризам и угостителство.

Целта на овој јавен повик е финансиска поддршка на новоосновани старт-ап и спин-оф компании и истиот се спроведува со поддршка на Светска банка.

Линк и повеќе информации за повикот и начинот за аплицирање се достапни на следниот линк: fitr.mk/startapuvaj

Досега вакви вакви настани се одржаа во Скопје, Битола, Тетово, Штип, Прилеп, Струмица и Охрид, како и во Стопанската комора на Македонија.